תהילים קיג

א   הַלְלוּ-יָהּהַלְלוּ עַבְדֵי יְהוָה    הַלְלוּ אֶת-שֵׁם יְהוָה. ב   יְהִי שֵׁם יְהוָה מְבֹרָךְ   מֵעַתָּה וְעַד-עוֹלָם. ג   מִמִּזְרַח-שֶׁמֶשׁ עַד-מְבוֹאוֹ   מְהֻלָּל שֵׁם יְהוָה. ד   רָם עַל-כָּל-גּוֹיִם יְהוָה    עַל הַשָּׁמַיִם כְּבוֹדוֹ. ה   מִי כַּיהוָה אֱלֹהֵינוּ   הַמַּגְבִּיהִי לָשָׁבֶת. ו   הַמַּשְׁפִּילִי לִרְאוֹת   בַּשָּׁמַיִם וּבָאָרֶץ. ז   מְקִימִי מֵעָפָר דָּל    מֵאַשְׁפֹּת יָרִים אֶבְיוֹן. ח   לְהוֹשִׁיבִי עִם-נְדִיבִים    עִם נְדִיבֵי עַמּוֹ. ט   מוֹשִׁיבִי עֲקֶרֶת הַבַּיִת   אֵם-הַבָּנִים שְׂמֵחָההַלְלוּ-יָהּ.