תהילים קח

א  שִׁיר מִזְמוֹר לְדָוִד. ב נָכוֹן לִבִּי אֱלֹהִים אָשִׁירָה וַאֲזַמְּרָה אַף-כְּבוֹדִי. ג   עוּרָה הַנֵּבֶל וְכִנּוֹר    אָעִירָה שָּׁחַר. ד   אוֹדְךָ בָעַמִּים יְהוָה    וַאֲזַמֶּרְךָ בַּלְאֻמִּים. ה   כִּי-גָדוֹל מֵעַל-שָׁמַיִם חַסְדֶּךָ    וְעַד-שְׁחָקִים אֲמִתֶּךָ. ו   רוּמָה עַל-שָׁמַיִם אֱלֹהִים    וְעַל כָּל-הָאָרֶץ כְּבוֹדֶךָ. ז   לְמַעַן יֵחָלְצוּן יְדִידֶיךָ    הוֹשִׁיעָה יְמִינְךָ וַעֲנֵנִי. ח   אֱלֹהִים דִּבֶּר בְּקָדְשׁוֹ אֶעְלֹזָה    אֲחַלְּקָה שְׁכֶם וְעֵמֶק סֻכּוֹת אֲמַדֵּד. ט   לִי גִלְעָד לִי מְנַשֶּׁה וְאֶפְרַיִם מָעוֹז רֹאשִׁי    יְהוּדָה מְחֹקְקִי. י   מוֹאָב סִיר רַחְצִי עַל-אֱדוֹם אַשְׁלִיךְ נַעֲלִי    עֲלֵי-פְלֶשֶׁת אֶתְרוֹעָע. יא   מִי יֹבִלֵנִי עִיר מִבְצָר    מִי נָחַנִי עַד-אֱדוֹם. יב   הֲלֹא-אֱלֹהִים זְנַחְתָּנוּ    וְלֹא-תֵצֵא אֱלֹהִים בְּצִבְאֹתֵינוּ. יג   הָבָה-לָּנוּ עֶזְרָת מִצָּר    וְשָׁוְא תְּשׁוּעַת אָדָם. יד   בֵּאלֹהִים נַעֲשֶׂה-חָיִל    וְהוּא יָבוּס צָרֵינוּ.