תהילים יט

א   לַמְנַצֵּחַ מִזְמוֹר לְדָוִד. ב   הַשָּׁמַיִם מְסַפְּרִים כְּבוֹד-אֵל    וּמַעֲשֵׂה יָדָיו מַגִּיד הָרָקִיעַ. ג   יוֹם לְיוֹם יַבִּיעַ אֹמֶר    וְלַיְלָה לְּלַיְלָה יְחַוֶּה-דָּעַת. ד   אֵין-אֹמֶר וְאֵין דְּבָרִים    בְּלִי נִשְׁמָע קוֹלָם. ה   בְּכָל-הָאָרֶץ יָצָא קַוָּם    וּבִקְצֵה תֵבֵל מִלֵּיהֶםלַשֶּׁמֶשׁ    שָׂם-אֹהֶל בָּהֶם. ו   וְהוּא כְּחָתָן יֹצֵא מֵחֻפָּתוֹ    יָשִׂישׂ כְּגִבּוֹר לָרוּץ אֹרַח. ז   מִקְצֵה הַשָּׁמַיִם מוֹצָאוֹ וּתְקוּפָתוֹ עַל-קְצוֹתָם    וְאֵין נִסְתָּר מֵחַמָּתוֹ. ח   תּוֹרַת יְהוָה תְּמִימָה מְשִׁיבַת נָפֶשׁ    עֵדוּת יְהוָה נֶאֱמָנָה מַחְכִּימַת פֶּתִי. ט   פִּקּוּדֵי יְהוָה יְשָׁרִים מְשַׂמְּחֵי-לֵב    מִצְוַת יְהוָה בָּרָה מְאִירַת עֵינָיִם. י   יִרְאַת יְהוָה טְהוֹרָה עוֹמֶדֶת לָעַד    מִשְׁפְּטֵי-יְהוָה אֱמֶת צָדְקוּ יַחְדָּו. יא   הַנֶּחֱמָדִים מִזָּהָב וּמִפַּז רָב    וּמְתוּקִים מִדְּבַשׁ וְנֹפֶת צוּפִים. יב   גַּם-עַבְדְּךָ נִזְהָר בָּהֶם    בְּשָׁמְרָם עֵקֶב רָב. יג   שְׁגִיאוֹת מִי-יָבִין    מִנִּסְתָּרוֹת נַקֵּנִי. יד   גַּם מִזֵּדִים חֲשֹׂךְ עַבְדֶּךָ   אַל-יִמְשְׁלוּ-בִי אָז אֵיתָםוְנִקֵּיתִי    מִפֶּשַׁע רָב. טו   יִהְיוּ לְרָצוֹן אִמְרֵי-פִי וְהֶגְיוֹן לִבִּי    לְפָנֶיךָיְהוָה    צוּרִי וְגֹאֲלִי.