שמואל ב כג

א וְאֵלֶּה דִּבְרֵי דָוִד הָאַחֲרֹנִים  נְאֻם דָּוִד בֶּן-יִשַׁי וּנְאֻם הַגֶּבֶר הֻקַם עָל מְשִׁיחַ אֱלֹהֵי יַעֲקֹב וּנְעִים זְמִרוֹת יִשְׂרָאֵל.  ב רוּחַ יְהוָה דִּבֶּר-בִּי וּמִלָּתוֹ עַל-לְשׁוֹנִי.  ג אָמַר אֱלֹהֵי יִשְׂרָאֵל לִי דִבֶּר צוּר יִשְׂרָאֵל  מוֹשֵׁל בָּאָדָם צַדִּיק מוֹשֵׁל יִרְאַת אֱלֹהִים.  ד וּכְאוֹר בֹּקֶר יִזְרַח-שָׁמֶשׁ בֹּקֶר לֹא עָבוֹת מִנֹּגַהּ מִמָּטָר דֶּשֶׁא מֵאָרֶץ.  ה כִּי-לֹא-כֵן בֵּיתִי עִם-אֵל  כִּי בְרִית עוֹלָם שָׂם לִי עֲרוּכָה בַכֹּל וּשְׁמֻרָה כִּי-כָל-יִשְׁעִי וְכָל-חֵפֶץ כִּי-לֹא יַצְמִיחַ.  ו וּבְלִיַּעַל כְּקוֹץ מֻנָד כֻּלָּהַם  כִּי-לֹא בְיָד יִקָּחוּ.  ז וְאִישׁ יִגַּע בָּהֶם יִמָּלֵא בַרְזֶל וְעֵץ חֲנִית וּבָאֵשׁ שָׂרוֹף יִשָּׂרְפוּ בַּשָּׁבֶת.  {פ}

ח אֵלֶּה שְׁמוֹת הַגִּבֹּרִים אֲשֶׁר לְדָוִד  יֹשֵׁב בַּשֶּׁבֶת תַּחְכְּמֹנִי רֹאשׁ הַשָּׁלִשִׁי הוּא עֲדִינוֹ העצנו (הָעֶצְנִי) עַל-שְׁמֹנֶה מֵאוֹת חָלָל בְּפַעַם אחד (אֶחָת).  {ס} ט וְאַחֲרָו אֶלְעָזָר בֶּן-דדי (דֹּדוֹ) בֶּן-אֲחֹחִי בִּשְׁלֹשָׁה גברים (הַגִּבֹּרִים) עִם-דָּוִד בְּחָרְפָם בַּפְּלִשְׁתִּים נֶאֶסְפוּ-שָׁם לַמִּלְחָמָה וַיַּעֲלוּ אִישׁ יִשְׂרָאֵל.  י הוּא קָם וַיַּךְ בַּפְּלִשְׁתִּים עַד כִּי-יָגְעָה יָדוֹ וַתִּדְבַּק יָדוֹ אֶל-הַחֶרֶב וַיַּעַשׂ יְהוָה תְּשׁוּעָה גְדוֹלָה בַּיּוֹם הַהוּא וְהָעָם יָשֻׁבוּ אַחֲרָיו אַךְ-לְפַשֵּׁט.  {ס} יא וְאַחֲרָיו שַׁמָּה בֶן-אָגֵא הָרָרִי וַיֵּאָסְפוּ פְלִשְׁתִּים לַחַיָּה וַתְּהִי-שָׁם חֶלְקַת הַשָּׂדֶה מְלֵאָה עֲדָשִׁים וְהָעָם נָס מִפְּנֵי פְלִשְׁתִּים.  יב וַיִּתְיַצֵּב בְּתוֹךְ-הַחֶלְקָה וַיַּצִּילֶהָ וַיַּךְ אֶת-פְּלִשְׁתִּים וַיַּעַשׂ יְהוָה תְּשׁוּעָה גְדוֹלָה.  {ס} יג וַיֵּרְדוּ שלשים (שְׁלֹשָׁה) מֵהַשְּׁלֹשִׁים רֹאשׁ וַיָּבֹאוּ אֶל-קָצִיר אֶל-דָּוִד אֶל-מְעָרַת עֲדֻלָּם וְחַיַּת פְּלִשְׁתִּים חֹנָה בְּעֵמֶק רְפָאִים.  יד וְדָוִד אָז בַּמְּצוּדָה וּמַצַּב פְּלִשְׁתִּים אָז בֵּית לָחֶם.  טו וַיִּתְאַוֶּה דָוִד וַיֹּאמַר  מִי יַשְׁקֵנִי מַיִם מִבֹּאר בֵּית-לֶחֶם אֲשֶׁר בַּשָּׁעַר.  {ס} טז וַיִּבְקְעוּ שְׁלֹשֶׁת הַגִּבֹּרִים בְּמַחֲנֵה פְלִשְׁתִּים וַיִּשְׁאֲבוּ-מַיִם מִבֹּאר בֵּית-לֶחֶם אֲשֶׁר בַּשַּׁעַר וַיִּשְׂאוּ וַיָּבִאוּ אֶל-דָּוִד וְלֹא אָבָה לִשְׁתּוֹתָם וַיַּסֵּךְ אֹתָם לַיהוָה.  יז וַיֹּאמֶר חָלִילָה לִּי יְהוָה מֵעֲשֹׂתִי זֹאת הֲדַם הָאֲנָשִׁים הַהֹלְכִים בְּנַפְשׁוֹתָם וְלֹא אָבָה לִשְׁתּוֹתָם אֵלֶּה עָשׂוּ שְׁלֹשֶׁת הַגִּבֹּרִים.  {ס} יח וַאֲבִישַׁי אֲחִי יוֹאָב בֶּן-צְרוּיָה הוּא רֹאשׁ השלשי (הַשְּׁלֹשָׁה) וְהוּא עוֹרֵר אֶת-חֲנִיתוֹ עַל-שְׁלֹשׁ מֵאוֹת חָלָל וְלוֹ-שֵׁם בַּשְּׁלֹשָׁה.  יט מִן-הַשְּׁלֹשָׁה הֲכִי נִכְבָּד וַיְהִי לָהֶם לְשָׂר וְעַד-הַשְּׁלֹשָׁה לֹא-בָא.  {ס} כ וּבְנָיָהוּ בֶן-יְהוֹיָדָע בֶּן-אִישׁ-חי (חַיִל) רַב-פְּעָלִים מִקַּבְצְאֵל הוּא הִכָּה אֵת שְׁנֵי אֲרִאֵל מוֹאָב וְהוּא יָרַד וְהִכָּה אֶת-האריה (הָאֲרִי) בְּתוֹךְ הַבֹּאר בְּיוֹם הַשָּׁלֶג.  כא וְהוּא-הִכָּה אֶת-אִישׁ מִצְרִי אשר (אִישׁ) מַרְאֶה וּבְיַד הַמִּצְרִי חֲנִית וַיֵּרֶד אֵלָיו בַּשָּׁבֶט וַיִּגְזֹל אֶת-הַחֲנִית מִיַּד הַמִּצְרִי וַיַּהַרְגֵהוּ בַּחֲנִיתוֹ.  כב אֵלֶּה עָשָׂה בְּנָיָהוּ בֶּן-יְהוֹיָדָע וְלוֹ-שֵׁם בִּשְׁלֹשָׁה הַגִּבֹּרִים.  כג מִן-הַשְּׁלֹשִׁים נִכְבָּד וְאֶל-הַשְּׁלֹשָׁה לֹא-בָא וַיְשִׂמֵהוּ דָוִד  {ר}
אֶל-מִשְׁמַעְתּוֹ.  {ס}  כד עֲשָׂהאֵל אֲחִי-יוֹאָב בַּשְּׁלֹשִׁים אֶלְחָנָן בֶּן-דֹּדוֹ  {ר}
בֵּית לָחֶם.  {ס}  כה שַׁמָּה הַחֲרֹדִי  {ס}  אֱלִיקָא  {ר}
הַחֲרֹדִי.  {ס}  כו חֶלֶץ הַפַּלְטִי  {ס}  עִירָא  {ר}
בֶן-עִקֵּשׁ  {ס}  הַתְּקוֹעִי.  {ס}  כז אֲבִיעֶזֶר  {ר}
הָעַנְּתֹתִי  {ס}  מְבֻנַּי הַחֻשָׁתִי.  {ס}  כח צַלְמוֹן  {ר}
הָאֲחֹחִי  {ס}  מַהְרַי הַנְּטֹפָתִי.  {ס}  כט חֵלֶב בֶּן-בַּעֲנָה  {ר}
הַנְּטֹפָתִי  {ס}  אִתַּי בֶּן-רִיבַי מִגִּבְעַת בְּנֵי בִנְיָמִן.  {ס}  ל בְּנָיָהוּ  {ר}
פִּרְעָתֹנִי  {ס}  הִדַּי מִנַּחֲלֵי גָעַשׁ.  {ס}  לא אֲבִי-עַלְבוֹן  {ר}
הָעַרְבָתִי  {ס}  עַזְמָוֶת הַבַּרְחֻמִי.  {ס}  לב אֶלְיַחְבָּא  {ר}
הַשַּׁעַלְבֹנִי  {ס}  בְּנֵי יָשֵׁן יְהוֹנָתָן.  {ס}  לג שַׁמָּה  {ר}
הַהֲרָרִי  {ס}  אֲחִיאָם בֶּן-שָׁרָר הָארָרִי.  {ס}  לד אֱלִיפֶלֶט  {ר}
בֶּן-אֲחַסְבַּי בֶּן-הַמַּעֲכָתִי  {ס}  אֱלִיעָם בֶּן-אֲחִיתֹפֶל  {ר}
הַגִּלֹנִי.  {ס}  לה חצרו (חֶצְרַי) הַכַּרְמְלִי  {ס}  פַּעֲרַי  {ר}
הָאַרְבִּי.  {ס}  לו יִגְאָל בֶּן-נָתָן מִצֹּבָה  {ס}  בָּנִי  {ר}
הַגָּדִי.  {ס}  לז צֶלֶק הָעַמֹּנִי  {ס}  נַחְרַי  {ר}
הַבְּאֵרֹתִי נשאי (נֹשֵׂא) כְּלֵי יוֹאָב בֶּן-צְרֻיָה.  {ס}  לח עִירָא  {ר}
הַיִּתְרִי  {ס}  גָּרֵב הַיִּתְרִי.  {ס}  לט אוּרִיָּה  {ר}
הַחִתִּי כֹּל שְׁלֹשִׁים וְשִׁבְעָה.  {פ}