משלי פרק יט

א טֽוֹב־רָשׁ הוֹלֵ֣ךְ בְּתֻמּ֑וֹ מֵעִקֵּ֥שׁ שְׂפָתָ֗יו וְה֣וּא כְסִֽיל ׃ ב גַּ֤ם בְּלֹא־דַ֣עַת נֶ֣פֶשׁ לֹא־ט֑וֹב וְאָ֖ץ בְּרַגְלַ֣יִם חוֹטֵֽא ׃ ג אִוֶּ֣לֶת אָדָם תְּסַלֵּ֣ף דַּרְכּ֑וֹ וְעַל־יְהוָ֗ה יִזְעַ֥ף לִבּֽוֹ ׃ ד ה֗וֹן יֹסִיף רֵעִ֣ים רַבִּ֑ים וְדָ֗ל מֵרֵ֥עהוּ יִפָּרֵֽד ׃ ה עֵ֣ד שְׁקָרִים לֹ֣א יִנָּקֶ֑ה וְיָפִ֥יחַ כְּזָבִ֗ים לֹ֣א יִמָּלֵֽט ׃ ו רַבִּים יְחַלּ֣וּ פְנֵֽי־נָדִ֑יב וְכָל־הָרֵ֗עַ לְאִ֣ישׁ מַתָּֽן ׃ ז כָּ֥ל אֲחֵי־רָ֨שׁ׀ שְֽׂנֵאֻ֗הוּ אַ֤ף כִּ֣י מְרֵעֵהוּ רָחֲק֣וּ מִמֶּ֑נּוּ מְרַדֵּ֖ף אֲמָרִ֣ים לֹא־הֵֽמָּה ׃ ח קֹֽנֶה־לֵּב אֹהֵ֣ב נַפְשׁ֑וֹ שֹׁמֵ֥ר תְּבוּנָ֗ה לִמְצֹא־טֽוֹב ׃ ט עֵ֣ד שְׁקָרִים לֹ֣א יִנָּקֶ֑ה וְיָפִ֖יחַ כְּזָבִ֣ים יֹאבֵֽד ׃ פ י לֹֽא־נָאוֶ֣ה לִכְסִ֣יל תַּעֲנ֑וּג אַ֗ף כִּֽי־לְעֶ֤בֶד׀ מְשֹׁ֬ל בְּשָׂרִֽים ׃ יא שֵׂ֣כֶל אָדָם הֶאֱרִ֣יךְ אַפּ֑וֹ וְתִפאַרְתּ֗וֹ עֲבֹ֣ר עַל־פָּֽשַׁע ׃ יב נַ֣הַם כַּכְּפִיר זַ֣עַף מֶ֑לֶךְ וּכְטַ֖ל עַל־עֵ֣שֶׂב רְצוֹנֽוֹ ׃ יג הַוֹּ֣ת לְאָבִיו בֵּ֣ן כְּסִ֑יל וְדֶ֥לֶף טֹרֵ֗ד מִדְיְנֵ֥י אִשָּֽׁה ׃ יד בַּ֣יִת וָהוֹן נַחֲלַ֣ת אָב֑וֹת וּמֵיְהוָ֗ה אִשָּׁ֥ה מַשְׂכָּֽלֶת ׃ טו עַצְלָה תַּפִּ֣יל תַּרְדֵּמָ֑ה וְנֶ֖פֶשׁ רְמִיָּ֣ה תִרְעָֽב ׃ טז שֹׁמֵ֣ר מִצְוָה שֹׁמֵ֣ר נַפְשׁ֑וֹ בּוֹזֵ֖ה דְרָכָ֣יו ֯יוּמָת ׃ יז מַלְוֵ֣ה יְהוָה ח֣וֹנֵֽן דָּ֑ל וּגְמֻל֗וֹ יְשַׁלֶּם־לֽוֹ ׃ יח יַסֵּ֣ר בִּנְךָ כִּי־יֵ֣שׁ תִּקְוָ֑ה וְאֶל־הֲמִית֗וֹ אַל־תִּשָּׂ֥א נַפְשֶֽׁךָ ׃ יט ֯גְּֽרָל־חֵ֭מָה נֹ֣שֵׂא עֹ֑נֶשׁ כִּ֥י אִם־תַּצִּ֗יל וְע֣וֹד תּוֹסִֽף ׃ כ שְׁמַ֣ע עֵצָה וְקַבֵּ֣ל מוּסָ֑ר לְמַ֗עַן תֶּחְכַּ֥ם בְּאַחֲרִיתֶֽךָ ׃ כא רַבּ֣וֹת מַחֲשָׁב֣וֹת בְּלֶב־אִ֑ישׁ וַעֲצַ֥ת יְהוָ֗ה הִ֣יא תָקֽוּם ׃ כב תַּאֲוַ֣ת אָדָ֣ם חַסְדּ֑וֹ וְטֽוֹב־רָשׁ מֵאִ֥ישׁ כָּזָֽב ׃ כג יִרְאַ֣ת יְהוָ֣ה לְחַיִּ֑ים וְשָׂבֵ֥עַ יָלִ֗ין בַּל־יִפָּ֥קֶד רָֽע ׃ כד טָ֘מַ֤ן עָצֵ֣ל יָדוֹ בַּצַּלָּ֑חַת גַּם־אֶל־פִּ֗יהוּ לֹ֣א יְשִׁיבֶֽנָּה ׃ כה לֵ֣ץ תַּכֶּה וּפֶ֣תִי יַעְרִ֑ם וְהוֹכִ֥יחַ לְנָב֗וֹן יָבִ֥ין דָּֽעַת ׃ כו מְֽשַׁדֶּד־אָב יַבְרִ֣יחַ אֵ֑ם בֵּ֗ן מֵבִ֥ישׁ וּמַחְפִּֽיר ׃ כז חַֽדַל־בְּנִי לִשְׁמֹ֣עַ מוּסָ֑ר לִשְׁג֗וֹת מֵֽאִמְרֵי־דָֽעַת ׃ כח עֵ֣ד בְּלִיַּעַל יָלִ֣יץ מִשְׁפָּ֑ט וּפִ֥י רְשָׁעִ֗ים יְבַלַּע־אָֽוֶן ׃ כט נָכ֣וֹנוּ לַלֵּצִ֣ים שְׁפָטִ֑ים וּמַהֲלֻמ֗וֹת לְגֵ֣ו כְּסִילִֽים ׃