גרסה רגילה גרסה מפוסקת גרסת טעמי המקרא לשיפור התצוגה

תנ"ך -> כתובים -> איוב

איוב פרק לה

א וַיַּ֥עַן אֱלִיה֗וּ וַיֹּאמַֽר ׃ ב הֲזֹאת חָשַׁ֣בְתָּ לְמִשְׁפָּ֑ט אָמַ֗רְתָּ צִדְקִ֥י מֵאֵֽל ׃ ג כִּֽי־תֹאמַר מַה־יִּסְכָּן־לָ֑ךְ מָֽה־אֹעִ֗יל מֵֽחַטָּאתִֽי ׃ ד אֲנִי אֲשִֽׁיבְךָ֣ מִלִּ֑ין וְֽאֶת־רֵעֶ֥יךָ עִמָּֽךְ ׃ ה הַבֵּ֣ט שָׁמַ֣יִם וּרְאֵ֑ה וְשׁ֥וּר שְׁחָקִ֗ים גָּבְה֥וּ מִמֶּֽךָּ ׃ ו אִם־חָטָאתָ מַה־תִּפְעָל־בּ֑וֹ וְרַבּ֥וּ פְשָׁעֶ֗יךָ מַה־תַּעֲשֶׂה־לּֽוֹ ׃ ז אִם־צָדַקְתָּ מַה־תִּתֶּן־ל֑וֹ א֥וֹ מַה־מִיָּדְךָ֥ יִקָּֽח ׃ ח לְאִישׁ־כָּמ֥וֹךָ רִשְׁעֶ֑ךָ וּלְבֶן־אָדָ֗ם צִדְקָתֶֽךָ ׃ ט מֵרֹב עֲשׁוּקִ֣ים יַזְעִ֑יקוּ יְשַׁוְּע֖וּ מִזְּר֣וֹעַ רַבִּֽים ׃ י וְֽלֹא־אָמַ֗ר אַיֵּה אֱל֣וֹהַּ עֹשָׂ֑י נֹתֵ֖ן זְמִר֣וֹת בַּלָּֽיְלָה ׃ יא מַלְּפֵנוּ מִבַּהֲמ֣וֹת אָ֑רֶץ וּמֵע֖וֹף הַשָּׁמַ֣יִם יְחַכְּמֵֽנוּ ׃ יב שָׁ֣ם יִצְעֲקוּ וְלֹ֣א יַעֲנֶ֑ה מִפְּנֵ֗י גְּא֣וֹן רָעִֽים ׃ יג אַךְ־שָׁוְא לֹא־יִשְׁמַ֥ע׀ אֵ֑ל וְשַׁדַּ֗י לֹ֣א יְשׁוּרֶֽנָּה ׃ יד אַ֣ף כִּֽי־תֹ֖אמַר לֹ֣א תְשׁוּרֶ֑נּוּ דִּ֥ין לְפָנָ֗יו וּתְח֥וֹלֵֽל לֽוֹ ׃ טו וְעַתָּ֗ה כִּי־אַיִן פָּקַ֣ד אַפּ֑וֹ וְלֹֽא־יָדַ֖ע בַּפַּ֣שׁ מְאֹֽד ׃ טז וְאִיּוֹב הֶ֣בֶל יִפְצֶה־פִּ֑יהוּ בִּבְלִי־דַ֗עַת מִלִּ֥ין יַכְבִּֽר ׃ פ



   לדף ראשי מאגר ספרות הקודש  

תנ"ך | משנה | תוספתא | תלמוד ירושלמי | תלמוד בבלי | מדרש תנחומא | משנה תורה לרמב"ם
 

לדף ראשי מקראנט | הפעלות ממוחשבות
 


 

החיפוש באתר זה הוא בשיתוף מורפיקס

כל הזכויות שמורות © (ראה תנאי שימוש | מדיניות פרטיות | הצהרת נגישות)
 
border
סנונית גשר מט"ח אבי חי מפמ"ר תנ"ך