איוב פרק כח

א כִּ֤י יֵ֣שׁ לַכֶּ֣סֶף מוֹצָ֑א וּמָק֗וֹם לַזָּהָ֥ב יָזֹֽקּוּ ׃ ב בַּרְזֶל מֵעָפָ֣ר יֻקָּ֑ח וְאֶ֗בֶן יָצ֥וּק נְחוּשָֽׁה ׃ ג קֵ֤ץ׀ שָׂ֤ם לַחֹ֗שֶׁךְ וּֽלְכָל־תַּכְלִית ה֣וּא חוֹקֵ֑ר אֶ֖בֶן אֹ֣פֶל וְצַלְמָֽוֶת ׃ ד פָּ֤רַץ נַ֨חַל׀ מֵֽעִם־גָּ֗ר הַֽנִּשְׁכָּחִ֥ים מִנִּי־רָ֑גֶל דַּ֖לּוּ מֵאֱנ֣וֹשׁ נָֽעוּ ׃ ה אֶ֗רֶץ מִמֶּ֥נָּה יֵֽצֵא־לָ֑חֶם וְתַחְתֶּ֗יהָ נֶהְפַּ֥ךְ כְּמוֹ־אֵֽשׁ ׃ ו מְקוֹם־סַפִּ֥יר אֲבָנֶ֑יהָ וְעַפְרֹ֖ת זָהָ֣ב לֽוֹ ׃ ז נָתִיב לֹֽא־יְדָ֣עוֹ עָ֑יִט וְלֹ֥א שְׁזָפַ֗תּוּ עֵ֣ין אַיָּֽה ׃ ח לֹֽא־הִדְרִיכֻ֥הוּ בְנֵי־שָׁ֑חַץ לֹֽא־עָדָ֖ה עָלָ֣יו שָֽׁחַל ׃ ט בַּֽחַלָּמִישׁ שָׁלַ֣ח יָד֑וֹ הָפַ֖ךְ מִשֹּׁ֣רֶשׁ הָרִֽים ׃ י בַּצּוּרוֹת יְאֹרִ֣ים בִּקֵּ֑עַ וְכָל־יְקָ֗ר רָאֲתָ֥ה עֵינֽוֹ ׃ יא מִבְּכִי נְהָר֣וֹת חִבֵּ֑שׁ וְתַעֲלֻמָ֗הּ יֹ֣צִא אֽוֹר ׃ פ יב וְֽהַחָכְמָה מֵאַ֣יִן תִּמָּצֵ֑א וְאֵ֥י זֶה מְק֣וֹם בִּינָֽה ׃ יג לֹא־יָדַ֣ע אֱנ֣וֹשׁ עֶרְכָּ֑הּ וְלֹ֥א תִמָּצֵ֗א בְּאֶ֣רֶץ הַֽחַיִּֽים ׃ יד תְּה֣וֹם אָמַר לֹ֣א בִי־הִ֑יא וְיָ֥ם אָמַ֗ר אֵ֣ין עִמָּדִֽי ׃ טו לֹא־יֻתַּ֣ן סְג֣וֹר תַּחְתֶּ֑יהָ וְלֹ֥א יִשָּׁקֵ֗ל כֶּ֣סֶף מְחִירָֽהּ ׃ טז לֹֽא־תְסֻלֶּה בְּכֶ֣תֶם אוֹפִ֑יר בְּשֹׁ֖הַם יָקָ֣ר וְסַפִּֽיר ׃ יז לֹא־יַעַרְכֶ֣נָּה זָהָב וּזְכוֹכִ֑ית וּתְמ֖וּרָתָ֣הּ כְּלִי־פָֽז ׃ יח רָאמ֣וֹת וְגָבִישׁ לֹ֣א יִזָּכֵ֑ר וּמֶ֥שֶׁךְ חָכְמָ֗ה מִפְּנִינִֽים ׃ יט לֹֽא־יַעַרְכֶנָּה פִּטְדַת־כּ֑וּשׁ בְּכֶ֥תֶם טָה֗וֹר לֹ֣א תְסֻלֶּֽה ׃ פ כ וְֽהַחָכְמָה מֵאַ֣יִן תָּב֑וֹא וְאֵ֥י זֶ֗ה מְק֣וֹם בִּינָֽה ׃ כא וְֽנֶעֶלְמָה מֵעֵינֵ֣י כָל־חָ֑י וּמֵע֖וֹף הַשָּׁמַ֣יִם נִסְתָּֽרָה ׃ כב אֲבַדּ֣וֹן וָמָוֶת אָ֣מְר֑וּ בְּאָזְנֵ֗ינוּ שָׁמַ֥עְנוּ שִׁמְעָֽהּ ׃ כג אֱלֹהִים הֵבִ֣ין דַּרְכָּ֑הּ וְה֗וּא יָדַ֥ע אֶת־מְקוֹמָֽהּ ׃ כד כִּי־ה֖וּא לִקְצוֹת־הָאָ֣רֶץ יַבִּ֑יט תַּ֖חַת כָּל־הַשָּׁמַ֣יִם יִרְאֶֽה ׃ כה לַעֲשׂ֣וֹת לָר֣וּחַ מִשְׁקָ֑ל וּמַ֗יִם תִּכֵּ֥ן בְּמִדָּֽה ׃ כו בַּעֲשׂת֣וֹ לַמָּטָ֣ר חֹ֑ק וְדֶ֗רֶךְ לַחֲזִ֥יז קֹלֽוֹת ׃ כז אָ֣ז רָאָהּ וַֽיְסַפְּרָ֑הּ הֱכִינָ֗הּ וְגַם־חֲקָרָֽהּ ׃ כח וַיֹּ֤אמֶר׀ לָֽאָדָ֗ם הֵ֤ן יִרְאַ֣ת אֲדֹנָי הִ֣יא חָכְמָ֑ה וְס֖וּר מֵרָ֣ע בִּינָֽה ׃ ס