איוב פרק כו

א וַיַּ֥עַן אִיּ֗וֹב וַיֹּאמַֽר ׃ ב מֶה־עָזַ֥רְתָּ לְלֹא־כֹ֑חַ הוֹשַׁ֗עְתָּ זְר֣וֹעַ לֹא־עֹֽז ׃ ג מַה־יָּעַצְתָּ לְלֹ֣א חָכְמָ֑ה וְתוּשִׁיָּ֗ה לָרֹ֥ב הוֹדָֽעְתָּ ׃ ד אֶת־מִי הִגַּ֣דְתָּ מִלִּ֑ין וְנִשְׁמַת־מִי יָצְאָ֥ה מִמֶּֽךָּ ׃ ה הָרְפָאִ֥ים יְחוֹלָ֑לוּ מִתַּ֥חַת מַ֗יִם וְשֹׁכְנֵיהֶֽם ׃ ו עָר֣וֹם שְׁא֣וֹל נֶגְדּ֑וֹ וְאֵ֥ין כְּס֗וּת לָֽאֲבַדּֽוֹן ׃ ז נֹטֶ֣ה צָפ֣וֹן עַל־תֹּ֑הוּ תֹּ֥לֶה אֶ֗רֶץ עַל־בְּלִי־מָֽה ׃ ח צֹרֵֽר־מַ֥יִם בְּעָבָ֑יו וְלֹא־נִבְקַ֖ע עָנָ֣ן תַּחְתָּֽם ׃ ט מְאַחֵ֥ז פְּנֵי־כִסֵּ֑ה פַּרְשֵׁ֖ז עָלָ֣יו עֲנָנֽוֹ ׃ י חֹֽק־חָג עַל־פְּנֵי־מָ֑יִם עַד־תַּכְלִ֖ית א֣וֹר עִם־חֹֽשֶׁךְ ׃ יא עַמּוּדֵ֣י שָׁמַ֣יִם יְרוֹפָ֑פוּ וְיִתְמְה֗וּ מִגַּעֲרָתֽוֹ ׃ יב בְּכֹחוֹ רָגַ֣ע הַיָּ֑ם ֯וּבִתוּבְנָתוֹ מָ֣חַץ רָֽהַב ׃ יג בְּרוּחוֹ שָׁמַ֣יִם שִׁפְרָ֑ה חֹֽלֲלָ֥ה יָד֗וֹ נָחָ֥שׁ בָּרִֽיחַ ׃ יד הֶן־אֵ֤לֶּה׀ קְצ֬וֹת ֯דְּרָכָ֗ו וּמַה־שֵּׁ֣מֶץ דָּבָר נִשְׁמַע־בּ֑וֹ וְרַ֥עַם ֯גְּבוּרֹתָ֗ו מִ֣י יִתְבּוֹנָֽן ׃ ס