איוב פרק ז

א הֲלֹא־צָבָ֣א לֶאֱנ֣וֹשׁ ֯עֲלֵ־אָ֑רֶץ וְכִימֵ֖י שָׂכִ֣יר יָמָֽיו ׃ ב כְּעֶ֥בֶד יִשְׁאַף־צֵ֑ל וּכְשָׂכִ֗יר יְקַוֶּ֥ה פָעֳלֽוֹ ׃ ג כֵּ֤ן הָנְחַ֣לְתִּי לִי יַרְחֵי־שָׁ֑וְא וְלֵיל֥וֹת עָמָ֗ל מִנּוּ־לִֽי ׃ ד אִם־שָׁכַ֗בְתִּי וְאָמַ֗רְתִּי מָתַ֣י אָקוּם וּמִדַּד־עָ֑רֶב וְשָׂבַ֖עְתִּי נְדֻדִ֣ים עֲדֵי־נָֽשֶׁף ׃ ה לָ֘בַ֤שׁ בְּשָׂרִ֣י רִמָּה ֯וְגִישׁ עָפָ֑ר עוֹרִ֥י רָגַ֗ע וַיִּמָּאֵֽס ׃ ו יָמַ֣י קַלּוּ מִנִּי־אָ֑רֶג וַיִּכְל֗וּ בְּאֶ֣פֶס תִּקְוָֽה ׃ ז זְכֹר כִּי־ר֣וּחַ חַיָּ֑י לֹא־תָשׁ֥וּב עֵינִ֗י לִרְא֥וֹת טֽוֹב ׃ ח לֹֽא־תְשׁוּרֵנִי עֵ֣ין רֹ֑אִי עֵינֶ֖יךָ בִּ֣י וְאֵינֶֽנִּי ׃ ט כָּלָ֣ה עָנָן וַיֵּלַ֑ךְ כֵּ֥ן יוֹרֵ֥ד שְׁא֗וֹל לֹ֣א יַעֲלֶֽה ׃ י לֹא־יָשׁ֣וּב ע֣וֹד לְבֵית֑וֹ וְלֹא־יַכִּירֶ֖נּוּ ע֣וֹד מְקֹמֽוֹ ׃ יא גַּם־אֲנִי֮ לֹ֤א אֶחֱשָׂ֫ךְ פִּ֥י אֲֽדַבְּרָה בְּצַ֣ר רוּחִ֑י אָשִׂ֗יחָה בְּמַ֣ר נַפְשִֽׁי ׃ יב הֲֽיָם־אָנִי אִם־תַּנִּ֑ין כִּֽי־תָשִׂ֖ים עָלַ֣י מִשְׁמָֽר ׃ יג כִּֽי־אָמַרְתִּי תְּנַחֲמֵ֣נִי עַרְשִׂ֑י יִשָּׂ֥א בְשִׂיחִ֗י מִשְׁכָּבִֽי ׃ יד וְחִתַּתַּ֥נִי בַחֲלֹמ֑וֹת וּֽמֵחֶזְיֹנ֥וֹת תְּבַעֲתַֽנִּי ׃ טו וַתִּבְחַ֣ר מַחֲנָ֣ק נַפְשִׁ֑י מָ֗וֶת מֵֽעַצְמוֹתָֽי ׃ טז מָאַסְתִּי לֹא־לְעֹלָ֣ם אֶֽחְיֶ֑ה חֲדַ֥ל מִמֶּ֗נִּי כִּי־הֶ֥בֶל יָמָֽי ׃ יז מָֽה־אֱנוֹשׁ כִּ֣י תְגַדְּלֶ֑נּוּ וְכִי־תָשִׁ֖ית אֵלָ֣יו לִבֶּֽךָ ׃ יח וַתִּפְקְדֶ֥נּוּ לִבְקָרִ֑ים לִרְגָעִ֗ים תִּבְחָנֶֽנּוּ ׃ יט כַּמָּה לֹא־תִשְׁעֶ֣ה מִמֶּ֑נִּי לֹֽא־תַרְפֵּ֗נִי עַד־בִּלְעִ֥י רֻקִּֽי ׃ כ חָטָ֡אתִי מָ֤ה אֶפְעַ֨ל׀ לָךְ֮ נֹצֵ֪ר הָאָ֫דָ֥ם לָ֤מָה שַׂמְתַּ֣נִי לְמִפְגָּ֣ע לָ֑ךְ וָאֶהְיֶ֖ה עָלַ֣י לְמַשָּֽׂא ׃ כא וּמֶ֤ה׀ לֹא־תִשָּׂ֣א פִשְׁעִי֮ וְתַעֲבִ֪יר אֶת־עֲוֹ֫נִ֥י כִּֽי־עַתָּה לֶעָפָ֣ר אֶשְׁכָּ֑ב וְשִׁ֖חֲרְתַּ֣נִי וְאֵינֶֽנִּי ׃ פ