תהילים פרק קנ

א הַ֥לְלוּ יָ֨הּ׀ הַֽלְלוּ־אֵ֥ל בְּקָדְשׁ֑וֹ הַֽלְל֗וּהוּ בִּרְקִ֥יעַ עֻזּֽוֹ ׃ ב הַֽלְל֥וּהוּ בִגְבוּרֹתָ֑יו הַֽלְל֗וּהוּ כְּרֹ֣ב גֻּדְלֽוֹ ׃ ג הַֽלְלוּהוּ בְּתֵ֣קַע שׁוֹפָ֑ר הַֽלְל֗וּהוּ בְּנֵ֣בֶל וְכִנּֽוֹר ׃ ד הַֽלְלוּהוּ בְתֹ֣ף וּמָח֑וֹל הַֽלְל֗וּהוּ בְּמִנִּ֥ים וְעוּגָֽב ׃ ה הַֽלְל֥וּהוּ בְצִלְצְלֵי־שָׁ֑מַע הַֽלְל֗וּהוּ בְּֽצִלְצְלֵ֥י תְרוּעָֽה ׃ ו כֹּ֣ל הַנְּשָׁמָה תְּהַלֵּ֥ל יָ֗הּ הַֽלְלוּ־יָֽהּ ׃