תהילים פרק קמט

א הַ֥לְלוּ יָ֨הּ׀ שִׁ֣ירוּ לַֽיהוָה שִׁ֣יר חָדָ֑שׁ תְּהִלָּת֗וֹ בִּקְהַ֥ל חֲסִידִֽים ׃ ב יִשְׂמַ֣ח יִשְׂרָאֵ֣ל בְּעֹשָׂ֑יו בְּנֵֽי־צִיּ֗וֹן יָגִ֥ילוּ בְמַלְכָּֽם ׃ ג יְהַֽלְל֣וּ שְׁמ֣וֹ בְמָח֑וֹל בְּתֹ֥ף וְכִנּ֗וֹר יְזַמְּרוּ־לֽוֹ ׃ ד כִּֽי־רוֹצֶ֣ה יְהוָ֣ה בְּעַמּ֑וֹ יְפָאֵ֥ר עֲנָוִ֗ים בִּישׁוּעָֽה ׃ ה יַעְלְז֣וּ חֲסִידִ֣ים בְּכָב֑וֹד יְרַנְּנ֗וּ עַל־מִשְׁכְּבוֹתָֽם ׃ ו רוֹמְמ֣וֹת אֵל בִּגְרוֹנָ֑ם וְחֶ֖רֶב פִּֽיפִיּ֣וֹת בְּיָדָֽם ׃ ז לַעֲשׂ֣וֹת נְקָמָה בַּגּוֹיִ֑ם תּֽוֹכֵחֹ֗ת בַּל־אֻמִּֽים ׃ ח לֶאְסֹ֣ר מַלְכֵיהֶ֣ם בְּזִקִּ֑ים וְנִכְבְּדֵיהֶ֗ם בְּכַבְלֵ֥י בַרְזֶֽל ׃ ט לַעֲשׂ֤וֹת בָּהֶ֨ם׀ מִשְׁפָּ֬ט כָּת֗וּב הָדָ֣ר הוּא לְכָל־חֲסִידָ֗יו הַֽלְלוּ־יָֽהּ ׃