תהילים פרק קלח

א לְדָוִ֨ד׀ אוֹדְךָ֥ בְכָל־לִבִּ֑י נֶ֖גֶד אֱלֹהִ֣ים אֲזַמְּרֶֽךָּ ׃ ב אֶשְׁתַּחֲוֶ֨ה אֶל־הֵיכַ֪ל קָדְשְׁךָ֡ וְא֘וֹדֶ֤ה אֶת־שְׁמֶ֗ךָ עַל־חַסְדְּךָ֥ וְעַל־אֲמִתֶּ֑ךָ כִּֽי־הִגְדַּ֥לְתָּ עַל־כָּל־שִׁמְךָ֗ אִמְרָתֶֽךָ ׃ ג בְּי֣וֹם קָרָֽאתִי וַֽתַּעֲנֵ֑נִי תַּרְהִבֵ֖נִי בְנַפְשִׁ֣י עֹֽז ׃ ד יוֹד֣וּךָ יְהוָה כָּל־מַלְכֵי־אָ֑רֶץ כִּ֥י שָׁמְע֗וּ אִמְרֵי־פִֽיךָ ׃ ה וְיָשִׁירוּ בְּדַרְכֵ֣י יְהוָ֑ה כִּ֥י גָד֗וֹל כְּב֣וֹד יְהוָֽה ׃ ו כִּי־רָ֣ם יְהוָה וְשָׁפָ֣ל יִרְאֶ֑ה וְגָבֹ֗הַּ מִמֶּרְחָ֥ק יְיֵדָֽע ׃ ז אִם־אֵלֵ֤ךְ׀ בְּקֶ֥רֶב צָרָ֗ה תְּחַ֫יֵּ֥נִי עַ֤ל אַ֣ף אֹיְבַי תִּשְׁלַ֣ח יָדֶ֑ךָ וְת֖וֹשִׁיעֵ֣נִי יְמִינֶֽךָ ׃ ח יְהוָה֮ יִגְמֹ֪ר בַּ֫עֲדִ֥י יְהוָה חַסְדְּךָ֣ לְעוֹלָ֑ם מַעֲשֵׂ֖י יָדֶ֣יךָ אַל־תֶּֽרֶף ׃