תהילים פרק קכט

א שִׁ֗יר הַֽמַּ֫עֲל֥וֹת רַבַּת צְרָר֣וּנִי מִנְּעוּרַ֑י יֹֽאמַר־נָא יִשְׂרָאֵֽל ׃ ב רַבַּת צְרָר֣וּנִי מִנְּעוּרָ֑י גַּם לֹא־יָ֥כְלוּ לִֽי ׃ ג עַל־גַּבִּי חָרְשׁ֣וּ חֹרְשִׁ֑ים הֶאֱרִ֗יכוּ ֯לְמַעֲנוֹתָם ׃ ד יְהוָ֥ה צַדִּ֑יק קִצֵּ֗ץ עֲב֣וֹת רְשָׁעִֽים ׃ ה יֵבֹשׁוּ וְיִסֹּ֣גוּ אָח֑וֹר כֹּ֗ל שֹׂנְאֵ֥י צִיּֽוֹן ׃ ו יִהְיוּ כַּחֲצִ֣יר גַּגּ֑וֹת שֶׁקַּדְמַ֖ת שָׁלַ֣ף יָבֵֽשׁ ׃ ז שֶׁלֹּ֤א מִלֵּ֖א כַפּ֥וֹ קוֹצֵ֗ר וְחִצְנ֥וֹ מְעַמֵּֽר ׃ ח וְלֹ֤א אָֽמְר֨וּ׀ הָעֹבְרִ֗ים בִּרְכַּֽת־יְהוָ֥ה אֲלֵיכֶ֑ם בֵּרַ֥כְנוּ אֶתְכֶ֗ם בְּשֵׁ֣ם יְהוָֽה ׃