תהילים פרק קכח

א שִׁ֗יר הַֽמַּ֫עֲל֥וֹת אַשְׁרֵי כָּל־יְרֵ֣א יְהוָ֑ה הַהֹלֵ֗ךְ בִּדְרָכָֽיו ׃ ב יְגִ֣יעַ כַּפֶּיךָ כִּ֣י תֹאכֵ֑ל אַשְׁרֶ֗יךָ וְט֣וֹב לָֽךְ ׃ ג אֶשְׁתְּךָ֤׀ כְּגֶ֥פֶן פֹּרִיָּה֮ בְּיַרְכְּתֵ֪י בֵ֫יתֶ֥ךָ בָּנֶיךָ כִּשְׁתִלֵ֣י זֵיתִ֑ים סָבִ֗יב לְשֻׁלְחָנֶֽךָ ׃ ד הִנֵּ֣ה כִי־כֵן יְבֹ֥רַךְ גָּ֗בֶר יְרֵ֣א יְהוָֽה ׃ ה יְבָרֶכְךָ֥ יְהוָ֗ה מִצִּ֫יּ֥וֹן וּרְאֵה בְּט֣וּב יְרוּשָׁלִָ֑ם כֹּ֗ל יְמֵ֣י חַיֶּֽיךָ ׃ ו וּרְאֵֽה־בָנִ֥ים לְבָנֶ֑יךָ שָׁל֗וֹם עַל־יִשְׂרָאֵֽל ׃