תהילים פרק קכו

א שִׁ֗יר הַֽמַּ֫עֲל֥וֹת בְּשׁ֣וּב יְהוָה אֶת־שִׁיבַ֣ת צִיּ֑וֹן הָיִ֗ינוּ כְּחֹלְמִֽים ׃ ב אָ֤ז יִמָּלֵ֪א שְׂח֡וֹק פִּינוּ֮ וּלְשׁוֹנֵ֪נוּ רִ֫נָּ֥ה אָז יֹאמְר֣וּ בַגּוֹיִ֑ם הִגְדִּ֥יל יְהוָ֗ה לַעֲשׂ֥וֹת עִם־אֵֽלֶּה ׃ ג הִגְדִּ֣יל יְהוָה לַעֲשׂ֥וֹת עִמָּ֗נוּ הָיִ֥ינוּ שְׂמֵחִֽים ׃ ד שׁוּבָ֣ה יְהוָה אֶת־֯שְׁבוּתֵנוּ כַּאֲפִיקִ֥ים בַּנֶּֽגֶב ׃ ה הַזֹּרְעִ֥ים בְּדִמְעָ֗ה בְּרִנָּ֥ה יִקְצֹֽרוּ ׃ ו הָ֘ל֤וֹךְ יֵלֵ֨ךְ׀ וּבָכֹה֮ נֹשֵׂ֪א מֶֽשֶׁךְ־הַ֫זָּ֥רַע בֹּֽא־יָב֥וֹא בְרִנָּ֑ה נֹשֵׂ֗א אֲלֻמֹּתָֽיו ׃