תהילים פרק קכה

א שִׁ֗יר הַֽמַּ֫עֲל֥וֹת הַבֹּטְחִ֥ים בַּיהוָ֑ה כְּֽהַר־צִיּ֥וֹן לֹא־יִמּ֗וֹט לְעוֹלָ֥ם יֵשֵֽׁב ׃ ב יְֽרוּשָׁלִַ֗ם הָרִים֮ סָבִ֪יב לָ֥הּ וַיהוָה סָבִ֣יב לְעַמּ֑וֹ מֵעַתָּ֗ה וְעַד־עוֹלָֽם ׃ ג כִּ֤י לֹ֪א יָנ֡וּחַ שֵׁ֤בֶט הָרֶ֗שַׁע עַל֮ גּוֹרַ֪ל הַֽצַּדִּ֫יקִ֥ים לְמַ֡עַן לֹא־יִשְׁלְח֖וּ הַצַּדִּיקִ֨ים בְּעַוְלָ֬תָה יְדֵיהֶֽם ׃ ד הֵיטִ֣יבָה יְהוָה לַטּוֹבִ֑ים וְלִֽישָׁרִ֗ים בְּלִבּוֹתָֽם ׃ ה וְהַמַּטִּ֤ים עַֽקַלְקַלּוֹתָ֗ם יוֹלִיכֵ֣ם יְהוָה אֶת־פֹּעֲלֵ֣י הָאָ֑וֶן שָׁל֗וֹם עַל־יִשְׂרָאֵֽל ׃