תהילים פרק קכג

א שִׁ֗יר הַֽמַּ֫עֲל֥וֹת אֵלֶיךָ נָשָׂ֣אתִי אֶת־עֵינַ֑י הַיֹּשְׁבִ֗י בַּשָּׁמָֽיִם ׃ ב הִנֵּ֨ה כְעֵינֵ֪י עֲבָדִ֡ים אֶל־יַ֤ד אֲֽדוֹנֵיהֶ֗ם כְּעֵינֵ֣י שִׁפְחָה֮ אֶל־יַ֪ד גְּבִ֫רְתָּ֥הּ כֵּ֣ן עֵינֵינוּ אֶל־יְהוָ֣ה אֱלֹהֵ֑ינוּ עַ֗ד שֶׁיְּחָנֵּֽנוּ ׃ ג חָנֵּ֣נוּ יְהוָ֣ה חָנֵּ֑נוּ כִּֽי־רַ֗ב שָׂבַ֥עְנוּ בֽוּז ׃ ד רַבַּת֮ שָֽׂבְעָה־לָּ֪הּ נַ֫פְשֵׁ֥נוּ הַלַּ֥עַג הַשַּׁאֲנַנִּ֑ים הַבּ֗וּז לִגְאֵ֥יוֹנִֽים ׃