תהילים פרק קכא

א שִׁ֗יר לַֽמַּ֫עֲל֥וֹת אֶשָּׂ֣א עֵינַי אֶל־הֶהָרִ֑ים מֵאַ֗יִן יָבֹ֥א עֶזְרִֽי ׃ ב עֶזְרִי מֵעִ֣ם יְהוָ֑ה עֹשֵׂ֗ה שָׁמַ֥יִם וָאָֽרֶץ ׃ ג אַל־יִתֵּ֣ן לַמּ֣וֹט רַגְלֶ֑ךָ אַל־יָנ֗וּם שֹֽׁמְרֶֽךָ ׃ ד הִנֵּ֣ה לֹֽא־יָנוּם וְלֹ֣א יִישָׁ֑ן שׁוֹמֵ֗ר יִשְׂרָאֵֽל ׃ ה יְהוָ֥ה שֹׁמְרֶ֑ךָ יְהוָ֥ה צִלְּךָ֗ עַל־יַ֥ד יְמִינֶֽךָ ׃ ו יוֹמָ֗ם הַשֶּׁ֥מֶשׁ לֹֽא־יַכֶּ֗כָּה וְיָרֵ֥חַ בַּלָּֽיְלָה ׃ ז יְֽהוָ֗ה יִשְׁמָרְךָ֥ מִכָּל־רָ֑ע יִשְׁמֹ֗ר אֶת־נַפְשֶֽׁךָ ׃ ח יְֽהוָ֗ה יִשְׁמָר־צֵאתְךָ֥ וּבוֹאֶ֑ךָ מֵֽעַתָּ֗ה וְעַד־עוֹלָֽם ׃