תהילים פרק קכ

א שִׁ֗יר הַֽמַּ֫עֲל֥וֹת אֶל־יְהוָה בַּצָּרָ֣תָה לִּ֑י קָרָ֗אתִי וַֽיַּעֲנֵֽנִי ׃ ב יְֽהוָ֗ה הַצִּ֣ילָה נַפְשִׁי מִשְּׂפַת־שֶׁ֑קֶר מִלָּשׁ֥וֹן רְמִיָּֽה ׃ ג מַה־יִּתֵּ֣ן לְךָ וּמַה־יֹּסִ֥יף לָ֗ךְ לָשׁ֥וֹן רְמִיָּֽה ׃ ד חִצֵּ֣י גִבּ֣וֹר שְׁנוּנִ֑ים עִ֗ם גַּחֲלֵ֥י רְתָמִֽים ׃ ה אֽוֹיָה־לִי כִּי־גַ֣רְתִּי מֶ֑שֶׁךְ שָׁכַ֗נְתִּי עִֽם־אָהֳלֵ֥י קֵדָֽר ׃ ו רַבַּת שָֽׁכְנָה־לָּ֣הּ נַפְשִׁ֑י עִ֗ם שׂוֹנֵ֥א שָׁלֽוֹם ׃ ז אֲֽנִי־שָׁלוֹם וְכִ֣י אֲדַבֵּ֑ר הֵ֗מָּה לַמִּלְחָמָֽה ׃