תהילים פרק קיג

א הַ֥לְלוּ יָ֨הּ׀ הַלְלוּ עַבְדֵ֣י יְהוָ֑ה הַֽלְלוּ אֶת־שֵׁ֥ם יְהוָֽה ׃ ב יְהִ֤י שֵׁ֣ם יְהוָ֣ה מְבֹרָ֑ךְ מֵֽעַתָּ֗ה וְעַד־עוֹלָֽם ׃ ג מִמִּזְרַח־שֶׁ֥מֶשׁ עַד־מְבוֹא֑וֹ מְהֻלָּ֗ל שֵׁ֣ם יְהוָֽה ׃ ד רָ֖ם עַל־כָּל־גּוֹיִ֥ם׀ יְהוָ֑ה עַ֖ל הַשָּׁמַ֣יִם כְּבוֹדֽוֹ ׃ ה מִי כַּיהוָ֣ה אֱלֹהֵ֑ינוּ הַֽמַּגְבִּיהִ֥י לָשָֽׁבֶת ׃ ו הַֽמַּשְׁפִּילִ֥י לִרְא֑וֹת בַּשָּׁמַ֥יִם וּבָאָֽרֶץ ׃ ז מְקִֽימִ֣י מֵעָפָ֣ר דָּ֑ל מֵֽאַשְׁפֹּ֗ת יָרִ֥ים אֶבְיֽוֹן ׃ ח לְהוֹשִׁיבִ֥י עִם־נְדִיבִ֑ים עִ֗ם נְדִיבֵ֥י עַמּֽוֹ ׃ ט מֽוֹשִׁיבִ֨י׀ עֲקֶ֬רֶת הַבַּ֗יִת אֵֽם־הַבָּנִ֥ים שְׂמֵחָ֗ה הַֽלְלוּ־יָֽהּ ׃