תהילים פרק קיב

א הַ֥לְלוּ יָ֨הּ׀ אַשְׁרֵי־אִישׁ יָרֵ֣א אֶת־יְהוָ֑ה בְּמִצְוֹתָ֗יו חָפֵ֥ץ מְאֹֽד ׃ ב גִּבּ֣וֹר בָּאָרֶץ יִהְיֶ֣ה זַרְע֑וֹ דּוֹר יְשָׁרִ֣ים יְבֹרָֽךְ ׃ ג הוֹן־וָעֹ֥שֶׁר בְּבֵית֑וֹ וְצִדְקָת֗וֹ עֹמֶ֥דֶת לָעַֽד ׃ ד זָ֘רַ֤ח בַּחֹ֣שֶׁךְ א֖וֹר לַיְשָׁרִ֑ים חַנּ֖וּן וְרַח֣וּם וְצַדִּֽיק ׃ ה טֽוֹב־אִישׁ חוֹנֵ֣ן וּמַלְוֶ֑ה יְכַלְכֵּ֖ל דְּבָרָ֣יו בְּמִשְׁפָּֽט ׃ ו כִּֽי־לְעוֹלָ֥ם לֹא־יִמּ֑וֹט לְזֵ֥כֶר עוֹלָ֗ם יִהְיֶ֥ה צַדִּֽיק ׃ ז מִשְּׁמוּעָ֣ה רָעָה לֹ֣א יִירָ֑א נָכ֥וֹן לִבּ֗וֹ בָּטֻ֥חַ בַּיהוָֽה ׃ ח סָמ֣וּךְ לִבּוֹ לֹ֣א יִירָ֑א עַ֖ד אֲשֶׁר־יִרְאֶ֣ה בְצָרָֽיו ׃ ט פִּזַּ֤ר׀ נָ֘תַ֤ן לָאֶבְיוֹנִ֗ים צִדְקָתוֹ עֹמֶ֣דֶת לָעַ֑ד קַרְנ֗וֹ תָּר֥וּם בְּכָבֽוֹד ׃ י רָ֘שָׁ֤ע יִרְאֶ֨ה׀ וְכָעָ֗ס שִׁנָּ֣יו יַחֲרֹ֣ק וְנָמָ֑ס תַּאֲוַ֖ת רְשָׁעִ֣ים תֹּאבֵֽד ׃