תהילים פרק קיא

א הַ֥לְלוּ יָ֨הּ׀ אוֹדֶ֣ה יְהוָה בְּכָל־לֵבָ֑ב בְּס֖וֹד יְשָׁרִ֣ים וְעֵדָֽה ׃ ב גְּדֹלִים מַעֲשֵׂ֣י יְהוָ֑ה דְּרוּשִׁ֗ים לְכָל־חֶפְצֵיהֶֽם ׃ ג הוֹד־וְהָדָ֥ר פָּֽעֳל֑וֹ וְצִדְקָת֗וֹ עֹמֶ֥דֶת לָעַֽד ׃ ד זֵ֣כֶר עָשָׂה לְנִפְלְאֹתָ֑יו חַנּ֖וּן וְרַח֣וּם יְהוָֽה ׃ ה טֶרֶף נָתַ֣ן לִֽירֵאָ֑יו יִזְכֹּ֖ר לְעוֹלָ֣ם בְּרִיתֽוֹ ׃ ו כֹּ֣חַ מַעֲשָׂיו הִגִּ֣יד לְעַמּ֑וֹ לָתֵ֥ת לָהֶ֗ם נַחֲלַ֥ת גּוֹיִֽם ׃ ז מַעֲשֵׂ֣י יָדָיו אֱמֶ֣ת וּמִשְׁפָּ֑ט נֶאֱמָנִ֗ים כָּל־פִּקּוּדָֽיו ׃ ח סְמוּכִ֣ים לָעַ֣ד לְעוֹלָ֑ם עֲשׂוּיִ֗ם בֶּאֱמֶ֥ת וְיָשָֽׁר ׃ ט פְּד֤וּת׀ שָׁ֘לַ֤ח לְעַמּ֗וֹ צִוָּֽה־לְעוֹלָ֥ם בְּרִית֑וֹ קָד֖וֹשׁ וְנוֹרָ֣א שְׁמֽוֹ ׃ י רֵ֘אשִׁ֤ית חָכְמָ֨ה׀ יִרְאַ֬ת יְהוָ֗ה שֵׂ֣כֶל ט֖וֹב לְכָל־עֹשֵׂיהֶ֑ם תְּהִלָּת֗וֹ עֹמֶ֥דֶת לָעַֽד ׃