תהילים פרק קח

א שִׁ֖יר מִזְמ֣וֹר לְדָוִֽד ׃ ב נָכ֣וֹן לִבִּ֣י אֱלֹהִ֑ים אָשִׁ֥ירָה וַאֲזַמְּרָ֗ה אַף־כְּבוֹדִֽי ׃ ג עוּרָֽה הַנֵּ֥בֶל וְכִנּ֗וֹר אָעִ֥ירָה שָּֽׁחַר ׃ ד אוֹדְךָ֖ בָעַמִּ֥ים׀ יְהוָ֑ה וַאֲזַמֶּרְךָ֗ בַּל־אֻמִּֽים ׃ ה כִּֽי־גָד֣וֹל מֵֽעַל־שָׁמַ֣יִם חַסְדֶּ֑ךָ וְֽעַד־שְׁחָקִ֥ים אֲמִתֶּֽךָ ׃ ו ר֣וּמָה עַל־שָׁמַ֣יִם אֱלֹהִ֑ים וְעַ֖ל כָּל־הָאָ֣רֶץ כְּבוֹדֶֽךָ ׃ ז לְמַעַן יֵחָלְצ֣וּן יְדִידֶ֑יךָ הוֹשִׁ֖יעָה יְמִֽינְךָ֣ וַעֲנֵֽנִי ׃ ח אֱלֹהִ֤ים׀ דִּבֶּ֥ר בְּקָדְשׁ֗וֹ אֶעְלֹ֥זָה אֲחַלְּקָ֥ה שְׁכֶ֑ם וְעֵ֖מֶק סֻכּ֣וֹת אֲמַדֵּֽד ׃ ט לִ֤י גִלְעָ֨ד׀ לִ֤י מְנַשֶּׁ֗ה וְאֶפְרַיִם מָע֣וֹז רֹאשִׁ֑י יְהוּדָ֗ה מְחֹקְקִֽי ׃ י מוֹאָ֤ב׀ סִ֬יר רַחְצִ֗י עַל־אֱדוֹם אַשְׁלִ֣יךְ נַעֲלִ֑י עֲלֵֽי־פְלֶ֗שֶׁת אֶתְרוֹעָֽע ׃ יא מִ֣י יֹבִלֵנִי עִ֣יר מִבְצָ֑ר מִ֖י נָחַ֣נִי עַד־אֱדֽוֹם ׃ יב הֲלֹֽא־אֱלֹהִ֥ים זְנַחְתָּ֑נוּ וְֽלֹא־תֵצֵ֥א אֱלֹהִ֗ים בְּצִבְאֹתֵֽינוּ ׃ יג הָֽבָה־לָּ֣נוּ עֶזְרָ֣ת מִצָּ֑ר וְשָׁ֗וְא תְּשׁוּעַ֥ת אָדָֽם ׃ יד בֵּֽאלֹהִ֥ים נַעֲשֶׂה־חָ֑יִל וְה֗וּא יָב֥וּס צָרֵֽינוּ ׃