תהילים פרק ק

א מִזְמ֥וֹר לְתוֹדָ֑ה הָרִ֥יעוּ לַיהוָ֗ה כָּל־הָאָֽרֶץ ׃ ב עִבְד֣וּ אֶת־יְהוָ֣ה בְּשִׂמְחָ֑ה בֹּ֥אוּ לְפָנָ֗יו בִּרְנָנָֽה ׃ ג דְּע֗וּ כִּֽי־יְהוָה֮ ה֤וּא אֱלֹ֫הִ֥ים הֽוּא־עָשָׂנוּ ֯וְלֹא אֲנַ֑חְנוּ עַמּ֗וֹ וְצֹ֣אן מַרְעִיתֽוֹ ׃ ד בֹּ֤אוּ שְׁעָרָ֨יו׀ בְּתוֹדָ֗ה חֲצֵרֹתָ֥יו בִּתְהִלָּ֑ה הֽוֹדוּ־ל֗וֹ בָּרֲכ֥וּ שְׁמֽוֹ ׃ ה כִּי־ט֣וֹב יְהֹוָה לְעוֹלָ֣ם חַסְדּ֑וֹ וְעַד־דֹּ֥ר וָדֹ֗ר אֱמוּנָתֽוֹ ׃