תהילים פרק צט

א יְהוָ֣ה מָלָךְ יִרְגְּז֣וּ עַמִּ֑ים יֹשֵׁ֥ב כְּרוּבִ֗ים תָּנ֥וּט הָאָֽרֶץ ׃ ב יְהוָה בְּצִיּ֣וֹן גָּד֑וֹל וְרָ֥ם ה֗וּא עַל־כָּל־הָֽעַמִּֽים ׃ ג יוֹד֣וּ שִׁמְךָ גָּד֥וֹל וְנוֹרָ֗א קָד֥וֹשׁ הֽוּא ׃ ד וְעֹ֥ז מֶלֶךְ֮ מִשְׁפָּ֪ט אָ֫הֵ֥ב אַתָּה כּוֹנַ֣נְתָּ מֵישָׁרִ֑ים מִשְׁפָּ֥ט וּצְדָקָ֗ה בְּיַעֲקֹ֤ב׀ אַתָּ֬ה עָשִֽׂיתָ ׃ ה רֽוֹמְמ֡וּ יְה֘וָ֤ה אֱלֹהֵ֗ינוּ וְֽהִשְׁתַּחֲווּ לַהֲדֹ֥ם רַגְלָ֗יו קָד֥וֹשׁ הֽוּא ׃ ו מֹ֘שֶׁ֤ה וְאַהֲרֹ֨ן׀ בְּֽכֹהֲנָ֗יו וּשְׁמוּאֵל בְּקֹרְאֵ֣י שְׁמ֑וֹ קֹרִ֥אים אֶל־יְהוָ֗ה וְה֣וּא יַעֲנֵֽם ׃ ז בְּעַמּ֣וּד עָנָן יְדַבֵּ֣ר אֲלֵיהֶ֑ם שָׁמְר֥וּ עֵדֹתָ֗יו וְחֹ֣ק נָֽתַן־לָֽמוֹ ׃ ח יְהוָ֣ה אֱלֹהֵינוּ֮ אַתָּ֪ה עֲנִ֫יתָ֥ם אֵ֣ל נֹשֵׂא הָיִ֣יתָ לָהֶ֑ם וְנֹקֵ֗ם עַל־עֲלִילוֹתָֽם ׃ ט רֽוֹמְמ֡וּ יְה֘וָ֤ה אֱלֹהֵ֗ינוּ וְהִֽשְׁתַּחֲווּ לְהַ֣ר קָדְשׁ֑וֹ כִּֽי־קָד֗וֹשׁ יְהוָ֥ה אֱלֹהֵֽינוּ ׃