תהילים פרק צח

א מִזְמ֡וֹר שִׁ֤ירוּ לַֽיהוָ֨ה׀ שִׁ֣יר חָדָשׁ כִּֽי־נִפְלָא֣וֹת עָשָׂ֑ה הוֹשִֽׁיעָה־לּ֥וֹ יְמִינ֗וֹ וּזְר֥וֹעַ קָדְשֽׁוֹ ׃ ב הוֹדִ֣יעַ יְהוָה יְשׁוּעָת֑וֹ לְעֵינֵ֥י הַגּוֹיִ֗ם גִּלָּ֥ה צִדְקָתֽוֹ ׃ ג זָ֘כַ֤ר חַסְדּ֨וֹ׀ וֶֽאֱֽמוּנָתוֹ֮ לְבֵ֪ית יִשְׂרָ֫אֵ֥ל רָא֥וּ כָל־אַפְסֵי־אָ֑רֶץ אֵ֗ת יְשׁוּעַ֥ת אֱלֹהֵֽינוּ ׃ ד הָרִ֣יעוּ לַֽיהוָה כָּל־הָאָ֑רֶץ פִּצְח֖וּ וְרַנְּנ֣וּ וְזַמֵּֽרוּ ׃ ה זַמְּר֣וּ לַיהוָ֣ה בְּכִנּ֑וֹר בְּכִנּ֗וֹר וְק֣וֹל זִמְרָֽה ׃ ו בַּחֲצֹ֣צְרוֹת וְק֣וֹל שׁוֹפָ֑ר הָרִ֗יעוּ לִפְנֵ֤י׀ הַמֶּ֬לֶךְ יְהוָֽה ׃ ז יִרְעַ֣ם הַיָּם וּמְלֹא֑וֹ תֵּבֵ֗ל וְיֹ֣שְׁבֵי בָֽהּ ׃ ח נְהָר֥וֹת יִמְחֲאוּ־כָ֑ף יַ֗חַד הָרִ֥ים יְרַנֵּֽנוּ ׃ ט לִֽפְֽנֵי־יְהוָ֗ה כִּ֥י בָא֮ לִשְׁפֹּ֪ט הָ֫אָ֥רֶץ יִשְׁפֹּֽט־תֵּבֵ֥ל בְּצֶ֑דֶק וְעַמִּ֗ים בְּמֵישָׁרִֽים ׃