תהילים פרק פז

א לִבְנֵי־קֹ֖רַח מִזְמ֣וֹר שִׁ֑יר יְסוּדָת֗וֹ בְּהַרְרֵי־קֹֽדֶשׁ ׃ ב אֹהֵ֣ב יְהוָה שַׁעֲרֵ֣י צִיּ֑וֹן מִכֹּ֗ל מִשְׁכְּנ֥וֹת יַעֲקֹֽב ׃ ג נִכְבָּדוֹת מְדֻבָּ֣ר בָּ֑ךְ עִ֖יר הָאֱלֹהִ֣ים סֶֽלָה ׃ ד אַזְכִּ֤יר׀ רַ֥הַב וּבָבֶ֗ל לְֽיֹ֫דְעָ֥י הִנֵּ֤ה פְלֶ֣שֶׁת וְצ֣וֹר עִם־כּ֑וּשׁ זֶ֗ה יֻלַּד־שָֽׁם ׃ ה וּֽלֲצִיּ֨וֹן׀ יֵאָמַ֗ר אִ֣ישׁ וְאִישׁ יֻלַּד־בָּ֑הּ וְה֖וּא יְכוֹנְנֶ֣הָ עֶלְיֽוֹן ׃ ו יְֽהוָ֗ה יִסְפֹּר בִּכְת֣וֹב עַמִּ֑ים זֶ֖ה יֻלַּד־שָׁ֣ם סֶֽלָה ׃ ז וְשָׁרִ֥ים כְּחֹלְלִ֑ים כָּֽל־מַעְיָנַ֥י בָּֽךְ ׃