תהילים פרק ע

א לַמְנַצֵּ֗חַ לְדָוִ֥ד לְהַזְכִּֽיר ׃ ב אֱלֹהִ֥ים לְהַצִּילֵ֑נִי יְהוָ֗ה לְעֶזְרָ֥תִי חֽוּשָֽׁה ׃ ג יֵבֹ֣שׁוּ וְיַחְפְּרוּ֮ מְבַקְשֵׁ֪י נַ֫פְשִׁ֥י יִסֹּ֣גוּ אָחוֹר וְיִכָּלְמ֑וּ חֲפֵצֵ֗י רָעָתִֽי ׃ ד יָשׁוּבוּ עַל־עֵ֣קֶב בָּשְׁתָּ֑ם הָאֹמְרִ֗ים הֶ֘אָ֥ח׀ הֶאָֽח ׃ ה יָ֘שִׂ֤ישׂוּ וְיִשְׂמְח֨וּ׀ בְּךָ֗ כָּֽל־מְבַ֫קְשֶׁ֥יךָ וְיֹאמְר֣וּ תָמִיד יִגְדַּ֣ל אֱלֹהִ֑ים אֹהֲבֵ֗י יְשׁוּעָתֶֽךָ ׃ ו וַאֲנִ֤י׀ עָנִ֣י וְאֶבְיוֹן֮ אֱלֹהִ֪ים חֽוּשָׁ֫ה־לִּ֥י עֶזְרִ֣י וּמְפַלְטִ֣י אַ֑תָּה יְהוָ֗ה אַל־תְּאַחַֽר ׃