תהילים פרק סז

א לַמְנַצֵּ֥ח בִּנְגִינֹ֗ת מִזְמ֥וֹר שִֽׁיר ׃ ב אֱלֹהִ֗ים יְחָנֵּ֥נוּ וִֽיבָרְכֵ֑נוּ יָ֤אֵ֥ר פָּנָ֖יו אִתָּ֣נוּ סֶֽלָה ׃ ג לָדַ֣עַת בָּאָ֣רֶץ דַּרְכֶּ֑ךָ בְּכָל־גּוֹיִ֗ם יְשׁוּעָתֶֽךָ ׃ ד יוֹד֖וּךָ עַמִּ֥ים׀ אֱלֹהִ֑ים יוֹד֗וּךָ עַמִּ֥ים כֻּלָּֽם ׃ ה יִֽשְׂמְח֥וּ וִֽירַנְּנ֗וּ לְאֻ֫מִּ֥ים כִּֽי־תִשְׁפֹּ֣ט עַמִּ֣ים מִישׁ֑וֹר וּלְאֻמִּ֓ים׀ בָּאָ֖רֶץ תַּנְחֵ֣ם סֶֽלָה ׃ ו יוֹד֖וּךָ עַמִּ֥ים׀ אֱלֹהִ֑ים יוֹד֗וּךָ עַמִּ֥ים כֻּלָּֽם ׃ ז אֶרֶץ נָתְנָ֣ה יְבוּלָ֑הּ יְבָרְכֵ֗נוּ אֱלֹהִ֥ים אֱלֹהֵֽינוּ ׃ ח יְבָרְכֵ֥נוּ אֱלֹהִ֑ים וְיִֽירְא֥וּ אֹת֗וֹ כָּל־אַפְסֵי־אָֽרֶץ ׃