תהילים פרק סד

א לַמְנַצֵּ֗חַ מִזְמ֥וֹר לְדָוִֽד ׃ ב שְׁמַע־אֱלֹהִ֣ים קוֹלִ֣י בְשִׂיחִ֑י מִפַּ֥חַד אוֹיֵ֗ב תִּצֹּ֥ר חַיָּֽי ׃ ג תַּסְתִּירֵנִי מִסּ֣וֹד מְרֵעִ֑ים מֵרִגְשַׁ֗ת פֹּ֣עֲלֵי אָֽוֶן ׃ ד אֲשֶׁ֤ר שָׁנְנ֣וּ כַחֶ֣רֶב לְשׁוֹנָ֑ם דָּרְכ֥וּ חִצָּ֗ם דָּבָ֥ר מָֽר ׃ ה לִיר֣וֹת בַּמִּסְתָּרִ֣ים תָּ֑ם פִּתְאֹ֥ם יֹרֻ֗הוּ וְלֹ֣א יִירָֽאוּ ׃ ו יְחַזְּקוּ־לָ֨מוֹ׀ דָּ֘בָ֤ר רָ֗ע יְֽסַפְּרוּ לִטְמ֣וֹן מוֹקְשִׁ֑ים אָמְר֗וּ מִ֣י יִרְאֶה־לָּֽמוֹ ׃ ז יַֽחְפְּֽשׂוּ־עוֹלֹ֗ת תַּמְנוּ חֵ֣פֶשׂ מְחֻפָּ֑שׂ וְקֶ֥רֶב אִ֗ישׁ וְלֵ֣ב עָמֹֽק ׃ ח וַיֹּרֵ֗ם אֱלֹ֫הִ֥ים חֵ֥ץ פִּתְא֑וֹם הָי֗וּ מַכּוֹתָֽם ׃ ט וַיַּכְשִׁיל֣וּהוּ עָלֵ֣ימוֹ לְשׁוֹנָ֑ם יִתְנֹדֲד֗וּ כָּל־רֹ֥אֵה בָֽם ׃ י וַיִּֽירְא֗וּ כָּל־אָ֫דָ֥ם וַיַּגִּידוּ פֹּ֥עַל אֱלֹהִ֗ים וּֽמַעֲשֵׂ֥הוּ הִשְׂכִּֽילוּ ׃ יא יִשְׂמַ֬ח צַדִּ֣יק בַּיהוָה וְחָ֣סָה ב֑וֹ וְיִתְהַֽלְל֗וּ כָּל־יִשְׁרֵי־לֵֽב ׃