תהילים פרק נג

א לַמְנַצֵּ֥חַ עַֽל־מָחֲלַ֗ת מַשְׂכִּ֥יל לְדָוִֽד ׃ ב אָ֘מַ֤ר נָבָ֣ל בְּלִבּוֹ אֵ֣ין אֱלֹהִ֑ים הִֽשְׁחִ֗יתוּ וְהִֽתְעִ֥יבוּ עָ֗וֶל אֵ֣ין עֹֽשֵׂה־טֽוֹב ׃ ג אֱֽלֹהִ֗ים מִשָּׁמַיִם֮ הִשְׁקִ֪יף עַֽל־בְּנֵ֫י אָדָ֥ם לִרְאוֹת הֲיֵ֣שׁ מַשְׂכִּ֑יל דֹּרֵ֗שׁ אֶת־אֱלֹהִֽים ׃ ד כֻּלּ֥וֹ סָג֮ יַחְדָּ֪ו נֶ֫אֱלָ֥חוּ אֵ֤ין עֹֽשֵׂה־ט֑וֹב אֵ֗ין גַּם־אֶחָֽד ׃ ה הֲלֹ֥א יָדְעוּ֮ פֹּ֤עֲלֵ֫י אָ֥וֶן אֹכְלֵ֣י עַמִּי אָ֣כְלוּ לֶ֑חֶם אֱלֹהִ֗ים לֹ֣א קָרָֽאוּ ׃ ו שָׁ֤ם׀ פָּֽחֲדוּ־פַחַד֮ לֹא־הָ֪יָה֫ פָ֥חַד כִּֽי־אֱלֹהִ֗ים פִּזַּר עַצְמ֣וֹת חֹנָ֑ךְ הֱבִשֹׁ֗תָה כִּֽי־אֱלֹהִ֥ים מְאָסָֽם ׃ ז מִ֥י יִתֵּ֣ן מִצִּיּוֹן֮ יְשֻׁע֪וֹת יִשְׂרָ֫אֵ֥ל בְּשׁ֣וּב אֱלֹהִים שְׁב֣וּת עַמּ֑וֹ יָגֵ֥ל יַעֲקֹ֗ב יִשְׂמַ֥ח יִשְׂרָאֵֽל ׃