תהילים פרק נא

א לַמְנַצֵּ֗חַ מִזְמ֥וֹר לְדָוִֽד ׃ ב בְּֽבוֹא־אֵלָיו נָתָ֣ן הַנָּבִ֑יא כַּֽאֲשֶׁר־בָּ֗א אֶל־בַּת־שָֽׁבַע ׃ ג חָנֵּ֣נִי אֱלֹהִ֣ים כְּחַסְדֶּ֑ךָ כְּרֹ֥ב רַחֲמֶ֗יךָ מְחֵ֣ה פְשָׁעָֽי ׃ ד ֯הַרְבֵּה כַּבְּסֵ֣נִי מֵעֲוֹנִ֑י וּֽמֵחַטָּאתִ֥י טַהֲרֵֽנִי ׃ ה כִּֽי־פְשָׁעַי אֲנִ֣י אֵדָ֑ע וְחַטָּאתִ֖י נֶגְדִּ֣י תָמִֽיד ׃ ו לְךָ֤ לְבַדְּךָ֨׀ חָטָאתִי֮ וְהָרַ֥ע בְּעֵינֶ֗יךָ עָ֫שִׂ֥יתִי לְמַעַן תִּצְדַּ֥ק בְּדָבְרֶ֗ךָ תִּזְכֶּ֥ה בְשָׁפְטֶֽךָ ׃ ז הֵן־בְּעָו֥וֹן חוֹלָ֑לְתִּי וּבְחֵ֗טְא יֶֽחֱמַ֥תְנִי אִמִּֽי ׃ ח הֵן־אֱמֶת חָפַ֣צְתָּ בַטֻּח֑וֹת וּבְסָתֻ֗ם חָכְמָ֥ה תוֹדִיעֵֽנִי ׃ ט תְּחַטְּאֵ֣נִי בְאֵז֣וֹב וְאֶטְהָ֑ר תְּכַבְּסֵ֗נִי וּמִשֶּׁ֥לֶג אַלְבִּֽין ׃ י תַּשְׁמִיעֵנִי שָׂשׂ֣וֹן וְשִׂמְחָ֑ה תָּגֵ֗לְנָה עֲצָמ֥וֹת דִּכִּֽיתָ ׃ יא הַסְתֵּ֣ר פָּנֶיךָ מֵחֲטָאָ֑י וְֽכָל־עֲוֹ֖נֹתַ֣י מְחֵֽה ׃ יב לֵ֣ב טָהוֹר בְּרָא־לִ֣י אֱלֹהִ֑ים וְר֥וּחַ נָכ֗וֹן חַדֵּ֥שׁ בְּקִרְבִּֽי ׃ יג אַל־תַּשְׁלִיכֵ֥נִי מִלְּפָנֶ֑יךָ וְר֥וּחַ קָדְשְׁךָ֗ אַל־תִּקַּ֥ח מִמֶּֽנִּי ׃ יד הָשִׁ֣יבָה לִּי שְׂשׂ֣וֹן יִשְׁעֶ֑ךָ וְר֖וּחַ נְדִיבָ֣ה תִסְמְכֵֽנִי ׃ טו אֲלַמְּדָ֣ה פֹשְׁעִ֣ים דְּרָכֶ֑יךָ וְחַטָּאִ֗ים אֵלֶ֥יךָ יָשֽׁוּבוּ ׃ טז הַצִּ֘ילֵ֤נִי מִדָּמִ֨ים׀ אֱֽלֹהִ֗ים אֱלֹהֵ֥י תְּשׁוּעָתִ֑י תְּרַנֵּ֥ן לְשׁוֹנִ֗י צִדְקָתֶֽךָ ׃ יז אֲדֹנָי שְׂפָתַ֣י תִּפְתָּ֑ח וּפִ֗י יַגִּ֥יד תְּהִלָּתֶֽךָ ׃ יח כִּ֤י׀ לֹא־תַחְפֹּ֣ץ זֶ֣בַח וְאֶתֵּ֑נָה עוֹלָ֗ה לֹ֣א תִרְצֶֽה ׃ יט זִֽבְחֵ֣י אֱלֹהִים֮ ר֪וּחַ נִשְׁבָּ֫רָ֥ה לֵב־נִשְׁבָּ֥ר וְנִדְכֶּ֑ה אֱלֹהִ֗ים לֹ֣א תִבְזֶֽה ׃ כ הֵיטִ֣יבָה בִרְצוֹנְךָ אֶת־צִיּ֑וֹן תִּבְנֶ֗ה חוֹמ֥וֹת יְרוּשָׁלִָֽם ׃ כא אָ֤ז תַּחְפֹּ֣ץ זִבְחֵי־צֶדֶק עוֹלָ֣ה וְכָלִ֑יל אָ֤ז יַעֲל֖וּ עַל־מִזְבַּחֲךָ֣ פָרִֽים ׃