תהילים פרק כז

א לְדָוִ֨ד׀ יְהוָ֤ה׀ אוֹרִ֣י וְיִשְׁעִי מִמִּ֣י אִירָ֑א יְהוָ֥ה מָֽעוֹז־חַיַּ֗י מִמִּ֥י אֶפְחָֽד ׃ ב בִּקְרֹ֤ב עָלַ֨י׀ מְרֵעִים֮ לֶאֱכֹ֪ל אֶת־בְּשָׂ֫רִ֥י צָרַ֣י וְאֹיְבַ֣י לִ֑י הֵ֖מָּה כָשְׁל֣וּ וְנָפָֽלוּ ׃ ג אִם־תַּחֲנֶ֬ה עָלַ֨י׀ מַחֲנֶה֮ לֹֽא־יִירָ֪א לִ֫בִּ֥י אִם־תָּק֣וּם עָלַי מִלְחָמָ֑ה בְּזֹ֗את אֲנִ֣י בוֹטֵֽחַ ׃ ד אַחַ֤ת׀ שָׁאַ֣לְתִּי מֵֽאֵת־יְהוָה֮ אוֹתָ֪הּ אֲבַ֫קֵּ֥שׁ שִׁבְתִּ֣י בְּבֵית־יְהוָה כָּל־יְמֵ֣י חַיַּ֑י לַחֲז֥וֹת בְּנֹֽעַם־יְהוָ֗ה וּלְבַקֵּ֥ר בְּהֵיכָלֽוֹ ׃ ה כִּ֤י יִצְפְּנֵ֨נִי׀ בְּסֻכֹּה֮ בְּי֪וֹם רָ֫עָ֥ה יַסְתִּרֵנִי בְּסֵ֣תֶר אָהֳל֑וֹ בְּצ֗וּר יְרוֹמְמֵֽנִי ׃ ו וְעַתָּ֨ה יָר֪וּם רֹאשִׁ֡י עַ֤ל אֹֽיְבַ֬י סְֽבִיבוֹתַ֗י וְאֶזְבְּחָ֣ה בְאָהֳלוֹ זִבְחֵ֣י תְרוּעָ֑ה אָשִׁ֥ירָה וַאֲזַמְּרָ֗ה לַיהוָֽה ׃ ז שְׁמַע־יְהוָ֖ה קוֹלִ֥י אֶקְרָ֗א וְחָנֵּ֥נִי וַעֲנֵֽנִי ׃ ח לְךָ֤׀ אָמַ֣ר לִבִּי בַּקְּשׁ֣וּ פָנָ֑י אֶת־פָּנֶ֖יךָ יְהוָ֣ה אֲבַקֵּֽשׁ ׃ ט אַל־תַּסְתֵּ֬ר פָּנֶ֨יךָ׀ מִמֶּנִּי֮ אַֽל־תַּט־בְּאַ֗ף עַ֫בְדֶּ֥ךָ עֶזְרָתִ֥י הָיִ֑יתָ אַֽל־תִּטְּשֵׁ֥נִי וְאַל־תַּֽעַזְבֵ֗נִי אֱלֹהֵ֥י יִשְׁעִֽי ׃ י כִּי־אָבִ֣י וְאִמִּ֣י עֲזָב֑וּנִי וַֽיהוָ֣ה יַֽאַסְפֵֽנִי ׃ יא ה֤וֹרֵ֥נִי יְהוָ֗ה דַּ֫רְכֶּ֥ךָ וּנְחֵנִי בְּאֹ֣רַח מִישׁ֑וֹר לְמַ֗עַן שׁוֹרְרָֽי ׃ יב אַֽל־תִּתְּנֵנִי בְּנֶ֣פֶשׁ צָרָ֑י כִּ֥י קָֽמוּ־בִ֥י עֵֽדֵי־שֶׁ֗קֶר וִיפֵ֥חַ חָמָֽס ׃ יג לׄוּלֵ֗ׄאׄ הֶאֱמַנְתִּי לִרְא֥וֹת בְּֽטוּב־יְהוָ֗ה בְּאֶ֣רֶץ חַיִּֽים ׃ יד קַוֵּ֗ה אֶל־יְה֫וָ֥ה חֲזַק וְיַאֲמֵ֣ץ לִבֶּ֑ךָ וְקַוֵּ֗ה אֶל־יְהוָֽה ׃