תהילים פרק כ

א לַמְנַצֵּ֗חַ מִזְמ֥וֹר לְדָוִֽד ׃ ב יַֽעַנְךָ֣ יְהוָה בְּי֣וֹם צָרָ֑ה יְשַׂגֶּבְךָ֗ שֵׁ֤ם׀ אֱלֹהֵ֬י יַעֲקֹֽב ׃ ג יִשְׁלַֽח־עֶזְרְךָ֥ מִקֹּ֑דֶשׁ וּמִצִּיּ֗וֹן יִסְעָדֶֽךָּ ׃ ד יִזְכֹּ֥ר כָּל־מִנְחֹתֶ֑ךָ וְעוֹלָתְךָ֖ יְדַשְּׁנֶ֣ה סֶֽלָה ׃ ה יִֽתֶּן־לְךָ֥ כִלְבָבֶ֑ךָ וְֽכָל־עֲצָתְךָ֥ יְמַלֵּֽא ׃ ו נְרַנְּנָ֤ה׀ בִּ֘ישׁ֤וּעָתֶ֗ךָ וּבְשֵֽׁם־אֱלֹהֵ֥ינוּ נִדְגֹּ֑ל יְמַלֵּ֥א יְהוָ֗ה כָּל־מִשְׁאֲלוֹתֶֽיךָ ׃ ז עַתָּ֤ה יָדַ֗עְתִּי כִּ֤י הוֹשִׁ֥יעַ׀ יְהוָ֗ה מְשִׁ֫יח֥וֹ יַעֲנֵהוּ מִשְּׁמֵ֣י קָדְשׁ֑וֹ בִּגְבֻר֗וֹת יֵ֣שַׁע יְמִינֽוֹ ׃ ח אֵ֣לֶּה בָרֶכֶב וְאֵ֣לֶּה בַסּוּסִ֑ים וַאֲנַ֓חְנוּ׀ בְּשֵׁם־יְהוָ֖ה אֱלֹהֵ֣ינוּ נַזְכִּֽיר ׃ ט הֵמָּה כָּרְע֣וּ וְנָפָ֑לוּ וַאֲנַ֥חְנוּ קַּ֗מְנוּ וַנִּתְעוֹדָֽד ׃ י יְהוָ֥ה הוֹשִׁ֑יעָה הַמֶּ֗לֶךְ יַעֲנֵ֥נוּ בְיוֹם־קָרְאֵֽנוּ ׃