תהילים פרק יט

א לַמְנַצֵּ֗חַ מִזְמ֥וֹר לְדָוִֽד ׃ ב הַשָּׁמַ֗יִם מְֽסַפְּרִ֥ים כְּבֽוֹד־אֵ֑ל וּֽמַעֲשֵׂ֥ה יָדָ֗יו מַגִּ֥יד הָרָקִֽיעַ ׃ ג י֣וֹם לְיוֹם יַבִּ֣יעַֽ אֹ֑מֶר וְלַ֥יְלָה לְּלַ֗יְלָה יְחַוֶּה־דָּֽעַת ׃ ד אֵֽין־אֹמֶר וְאֵ֣ין דְּבָרִ֑ים בְּלִ֗י נִשְׁמָ֥ע קוֹלָֽם ׃ ה בְּכָל־הָאָ֨רֶץ׀ יָ֘צָ֤א קַוָּ֗ם וּבִקְצֵ֣ה תֵבֵל מִלֵּיהֶ֑ם לַשֶּׁ֗מֶשׁ שָֽׂם־אֹ֥הֶל בָּהֶֽם ׃ ו וְה֗וּא כְּחָתָן יֹצֵ֣א מֵחֻפָּת֑וֹ יָשִׂ֥ישׂ כְּגִבּ֗וֹר לָר֥וּץ אֹֽרַח ׃ ז מִקְצֵ֤ה הַשָּׁמַ֨יִם׀ מֽוֹצָא֗וֹ וּתְקוּפָת֥וֹ עַל־קְצוֹתָ֑ם וְאֵ֥ין נִסְתָּ֗ר מֵֽחַמָּתוֹ ׃ ח תּ֘וֹרַ֤ת יְהוָ֣ה תְּמִימָה מְשִׁ֣יבַת נָ֑פֶשׁ עֵד֥וּת יְהוָ֥ה נֶאֱמָנָ֗ה מַחְכִּ֥ימַת פֶּֽתִי ׃ ט פִּקּ֘וּדֵ֤י יְהוָ֣ה יְשָׁרִים מְשַׂמְּחֵי־לֵ֑ב מִצְוַ֥ת יְהוָ֥ה בָּרָ֗ה מְאִירַ֥ת עֵינָֽיִם ׃ י יִרְאַ֤ת יְהוָ֨ה׀ טְהוֹרָה֮ עוֹמֶ֪דֶת לָ֫עַ֥ד מִֽשְׁפְּטֵי־יְהוָ֥ה אֱמֶ֑ת צָֽדְק֥וּ יַחְדָּֽו ׃ יא הַֽנֶּחֱמָדִ֗ים מִזָּהָב וּמִפַּ֣ז רָ֑ב וּמְתוּקִ֥ים מִדְּבַ֗שׁ וְנֹ֣פֶת צוּפִֽים ׃ יב גַּֽם־עַבְדְּךָ נִזְהָ֣ר בָּהֶ֑ם בְּשָׁמְרָ֗ם עֵ֣קֶב רָֽב ׃ יג שְׁגִיא֥וֹת מִֽי־יָבִ֑ין מִֽנִּסְתָּר֥וֹת נַקֵּֽנִי ׃ יד גַּ֤ם מִזֵּדִ֨ים׀ חֲשֹׂ֬ךְ עַבְדֶּ֗ךָ אַֽל־יִמְשְׁלוּ־בִ֣י אָ֣ז אֵיתָ֑ם וְנִקֵּ֗יתִי מִפֶּ֥שַֽׁע רָֽב ׃ טו יִֽהְי֥וּ לְרָצ֨וֹן׀ אִמְרֵי־פִ֡י וְהֶגְי֣וֹן לִבִּ֣י לְפָנֶ֑יךָ יְהוָ֗ה צוּרִ֥י וְגֹאֲלִֽי ׃