תהילים פרק טו

א מִזְמ֗וֹר לְדָ֫וִ֥ד יְהֹוָה מִי־יָג֣וּר בְּאָהֳלֶ֑ךָ מִֽי־יִשְׁכֹּ֗ן בְּהַ֣ר קָדְשֶֽׁךָ ׃ ב הוֹלֵ֣ךְ תָּמִים וּפֹעֵ֥ל צֶ֑דֶק וְדֹבֵ֥ר אֱמֶ֗ת בִּלְבָבֽוֹ ׃ ג לֹֽא־רָגַ֨ל׀ עַל־לְשֹׁנ֗וֹ לֹא־עָשָׂ֣ה לְרֵעֵ֣הוּ רָעָ֑ה וְחֶרְפָּ֗ה לֹא־נָשָׂ֥א עַל־קְרֹֽבוֹ ׃ ד נִבְזֶ֤ה׀ בְּֽעֵ֘ינָ֤יו נִמְאָ֗ס וְאֶת־יִרְאֵ֣י יְהוָ֣ה יְכַבֵּ֑ד נִשְׁבַּ֥ע לְהָרַ֗ע וְלֹ֣א יָמִֽר ׃ ה כַּסְפּ֤וֹ׀ לֹא־נָתַ֣ן בְּנֶשֶׁךְ֮ וְשֹׁ֥חַד עַל־נָקִ֗י לֹ֥א לָ֫קָ֥ח עֹֽשֵׂה־אֵ֑לֶּה לֹ֖א יִמּ֣וֹט לְעוֹלָֽם ׃