תהילים פרק יג

א לַמְנַצֵּ֗חַ מִזְמ֥וֹר לְדָוִֽד ׃ ב עַד־אָ֣נָה יְהוָה תִּשְׁכָּחֵ֣נִי נֶ֑צַח עַד־אָ֓נָה׀ תַּסְתִּ֖יר אֶת־פָּנֶ֣יךָ מִמֶּֽנִּי ׃ ג עַד־אָ֨נָה אָשִׁ֪ית עֵצ֡וֹת בְּנַפְשִׁ֗י יָג֣וֹן בִּלְבָבִ֣י יוֹמָ֑ם עַד־אָ֓נָה׀ יָר֖וּם אֹיְבִ֣י עָלָֽי ׃ ד הַבִּ֣יטָֽה עֲנֵנִי יְהוָ֣ה אֱלֹהָ֑י הָאִ֥ירָה עֵינַ֗י פֶּן־אִישַׁ֥ן הַמָּֽוֶת ׃ ה פֶּן־יֹאמַ֣ר אֹיְבִ֣י יְכָלְתִּ֑יו צָרַ֥י יָגִ֗ילוּ כִּ֣י אֶמּֽוֹט ׃ ו וַאֲנִ֤י׀ בְּחַסְדְּךָ֣ בָטַחְתִּי֮ יָ֤גֵ֥ל לִבִּ֗י בִּֽישׁוּעָ֫תֶ֥ךָ אָשִׁ֥ירָה לַיהוָ֑ה כִּ֖י גָמַ֣ל עָלָֽי ׃