תהילים פרק ו

א לַמְנַצֵּ֣חַ בִּנְגִינוֹת עַֽל־הַשְּׁמִינִ֗ית מִזְמ֥וֹר לְדָוִֽד ׃ ב יְֽהוָ֗ה אַל־בְּאַפְּךָ֥ תוֹכִיחֵ֑נִי וְֽאַל־בַּחֲמָתְךָ֥ תְיַסְּרֵֽנִי ׃ ג חָנֵּ֥נִי יְהוָה֮ כִּ֤י אֻמְלַ֫ל אָ֥נִי רְפָאֵ֥נִי יְהוָ֑ה כִּ֖י נִבְהֲל֣וּ עֲצָמָֽי ׃ ד וְנַפְשִׁי נִבְהֲלָ֣ה מְאֹ֑ד ֯וְאַתְּ יְהוָ֗ה עַד־מָתָֽי ׃ ה שׁוּבָ֣ה יְהוָה חַלְּצָ֣ה נַפְשִׁ֑י הוֹשִׁיעֵ֗נִי לְמַ֣עַן חַסְדֶּֽךָ ׃ ו כִּ֤י אֵ֣ין בַּמָּ֣וֶת זִכְרֶ֑ךָ בִּשְׁא֗וֹל מִ֣י יֽוֹדֶה־לָּֽךְ ׃ ז יָגַ֤עְתִּי׀ בְּֽאַנְחָתִ֗י אַשְׂחֶ֣ה בְכָל־לַיְלָה מִטָּתִ֑י בְּדִמְעָתִ֗י עַרְשִׂ֥י אַמְסֶֽה ׃ ח עָֽשְׁשָׁ֣ה מִכַּ֣עַס עֵינִ֑י עָֽתְקָ֗ה בְּכָל־צוֹרְרָֽי ׃ ט ס֣וּרוּ מִמֶּנִּי כָּל־פֹּ֣עֲלֵי אָ֑וֶן כִּֽי־שָׁמַ֥ע יְהוָ֗ה ק֣וֹל בִּכְיִֽי ׃ י שָׁמַ֣ע יְהוָה תְּחִנָּתִ֑י יְהוָ֗ה תְּֽפִלָּתִ֥י יִקָּֽח ׃ יא יֵבֹ֤שׁוּ׀ וְיִבָּהֲל֣וּ מְאֹד כָּל־אֹיְבָ֑י יָשֻׁ֗בוּ יֵבֹ֥שׁוּ רָֽגַע ׃