תהילים פרק ג

א מִזְמ֥וֹר לְדָוִ֑ד בְּבָרְח֗וֹ מִפְּנֵ֤י׀ אַבְשָׁל֬וֹם בְּנֽוֹ ׃ ב יְהוָה מָֽה־רַבּ֣וּ צָרָ֑י רַבִּ֗ים קָמִ֥ים עָלָֽי ׃ ג רַבִּים֮ אֹמְרִ֪ים לְנַ֫פְשִׁ֥י אֵ֤ין יְֽשׁוּעָ֓תָה לּ֬וֹ בֵֽאלֹהִ֬ים סֶֽלָה ׃ ד וְאַתָּ֣ה יְהוָה מָגֵ֣ן בַּעֲדִ֑י כְּבוֹדִ֗י וּמֵרִ֥ים רֹאשִֽׁי ׃ ה קוֹלִי אֶל־יְהוָ֣ה אֶקְרָ֑א וַיַּֽעֲנֵ֨נִי מֵהַ֖ר קָדְשׁ֣וֹ סֶֽלָה ׃ ו אֲנִ֥י שָׁכַ֗בְתִּי וָֽאִ֫ישָׁ֥נָה הֱקִיצ֑וֹתִי כִּ֖י יְהוָ֣ה יִסְמְכֵֽנִי ׃ ז לֹֽא־אִירָא מֵרִבְב֥וֹת עָ֑ם אֲשֶׁ֥ר סָבִ֗יב שָׁ֣תוּ עָלָֽי ׃ ח ק֘וּמָ֤ה יְהוָ֨ה׀ הוֹשִׁ֘יעֵ֤נִי אֱלֹהַ֗י כִּֽי־הִכִּ֣יתָ אֶת־כָּל־אֹיְבַ֣י לֶ֑חִי שִׁנֵּ֖י רְשָׁעִ֣ים שִׁבַּֽרְתָּ ׃ ט לַיהוָ֥ה הַיְשׁוּעָ֑ה עַֽל־עַמְּךָ֖ בִרְכָתֶ֣ךָ סֶּֽלָה ׃