משלי פרק כ

א לֵ֣ץ הַיַּיִן הֹמֶ֣ה שֵׁכָ֑ר וְכָל־שֹׁ֥גֶה בּ֗וֹ לֹ֣א יֶחְכָּֽם ׃ ב נַ֣הַם כַּכְּפִיר אֵ֣ימַת מֶ֑לֶךְ מִתְעַבְּר֗וֹ חוֹטֵ֥א נַפְשֽׁוֹ ׃ ג כָּב֣וֹד לָאִישׁ שֶׁ֣בֶת מֵרִ֑יב וְכָל־אֱוִ֗יל יִתְגַּלָּֽע ׃ ד מֵחֹרֶף עָצֵ֣ל לֹא־יַחֲרֹ֑שׁ ֯יִשְׁאַל בַּקָּצִ֣יר וָאָֽיִן ׃ ה מַ֣יִם עֲמֻקִּים עֵצָ֣ה בְלֶב־אִ֑ישׁ וְאִ֖ישׁ תְּבוּנָ֣ה יִדְלֶֽנָּה ׃ ו רָב־אָדָ֗ם יִקְרָא אִ֣ישׁ חַסְדּ֑וֹ וְאִ֥ישׁ אֱמוּנִ֗ים מִ֣י יִמְצָֽא ׃ ז מִתְהַלֵּ֣ךְ בְּתֻמּ֣וֹ צַדִּ֑יק אַשְׁרֵ֖י בָנָ֣יו אַחֲרָֽיו ׃ ח מֶ֗לֶךְ יוֹשֵׁ֥ב עַל־כִּסֵּא־דִ֑ין מְזָרֶ֖ה בְעֵינָ֣יו כָּל־רָֽע ׃ ט מִֽי־יֹאמַר זִכִּ֣יתִי לִבִּ֑י טָהַ֗רְתִּי מֵחַטָּאתִֽי ׃ י אֶ֣בֶן וָאֶבֶן אֵיפָ֣ה וְאֵיפָ֑ה תּוֹעֲבַ֥ת יְהוָ֗ה גַּם־שְׁנֵיהֶֽם ׃ יא גַּ֣ם בְּמַעֲלָלָיו יִתְנַכֶּר־נָ֑עַר אִם־זַ֖ךְ וְאִם־יָשָׁ֣ר פָּעֳלֽוֹ ׃ יב אֹ֣זֶן שֹׁמַעַת וְעַ֣יִן רֹאָ֑ה יְהוָ֗ה עָשָׂ֥ה גַם־שְׁנֵיהֶֽם ׃ יג אַל־תֶּֽאֱהַ֣ב שֵׁנָה פֶּן־תִּוָּרֵ֑שׁ פְּקַ֖ח עֵינֶ֣יךָ שְֽׂבַֽע־לָֽחֶם ׃ יד רַ֣ע רַע יֹאמַ֣ר הַקּוֹנֶ֑ה וְאֹזֵ֥ל ל֗וֹ אָ֣ז יִתְהַלָּֽל ׃ טו יֵ֣שׁ זָהָב וְרָב־פְּנִינִ֑ים וּכְלִ֥י יְקָ֗ר שִׂפְתֵי־דָֽעַת ׃ טז לְֽקַח־בִּגְדוֹ כִּי־עָ֣רַב זָ֑ר וּבְעַ֖ד ֯נָכְרִים חַבְלֵֽהוּ ׃ יז עָרֵ֣ב לָאִישׁ לֶ֣חֶם שָׁ֑קֶר וְאַחַ֗ר יִמָּֽלֵא־פִ֥יהוּ חָצָֽץ ׃ יח מַחֲשָׁבוֹת בְּעֵצָ֣ה תִכּ֑וֹן וּבְתַחְבֻּל֗וֹת עֲשֵׂ֣ה מִלְחָמָֽה ׃ יט גּֽוֹלֶה־סּוֹד הוֹלֵ֣ךְ רָכִ֑יל וּלְפֹתֶ֥ה שְׂפָתָ֗יו לֹ֣א תִתְעָרָֽב ׃ כ מְקַלֵּל אָבִ֣יו וְאִמּ֑וֹ יִֽדְעַ֥ךְ נֵר֗וֹ ֯בְּאִישׁוֹן חֹֽשֶׁךְ ׃ כא נַחֲלָה ֯מְבֻחֶלֶת בָּרִאשֹׁנָ֑ה וְאַחֲרִיתָ֗הּ לֹ֣א תְבֹרָֽךְ ׃ כב אַל־תֹּאמַ֥ר אֲשַׁלְּמָה־רָ֑ע קַוֵּ֥ה לַֽיהוָ֗ה וְיֹ֣שַֽׁע לָֽךְ ׃ כג תּוֹעֲבַ֣ת יְהוָה אֶ֣בֶן וָאָ֑בֶן וּמֹאזְנֵ֖י מִרְמָ֣ה לֹא־טֽוֹב ׃ כד מֵיְהוָ֥ה מִצְעֲדֵי־גָ֑בֶר וְאָדָ֗ם מַה־יָּבִ֥ין דַּרְכּֽוֹ ׃ כה מוֹקֵ֣שׁ אָדָם יָ֣לַע קֹ֑דֶשׁ וְאַחַ֖ר נְדָרִ֣ים לְבַקֵּֽר ׃ כו מְזָרֶ֣ה רְשָׁעִים מֶ֣לֶךְ חָכָ֑ם וַיָּ֖שֶׁב עֲלֵיהֶ֣ם אוֹפָֽן ׃ כז נֵ֣ר יְהוָה נִשְׁמַ֣ת אָדָ֑ם חֹפֵ֗שׂ כָּל־חַדְרֵי־בָֽטֶן ׃ כח חֶ֣סֶד וֶאֱמֶת יִצְּרוּ־מֶ֑לֶךְ וְסָעַ֖ד בַּחֶ֣סֶד כִּסְאֽוֹ ׃ כט תִּפְאֶ֣רֶת בַּחוּרִ֣ים כֹּחָ֑ם וַהֲדַ֖ר זְקֵנִ֣ים שֵׂיבָֽה ׃ ל חַבֻּר֣וֹת פֶּצַע ֯תַּמְרִיק בְּרָ֑ע וּמַכּ֗וֹת חַדְרֵי־בָֽטֶן ׃