גרסה רגילה גרסה מפוסקת גרסת טעמי המקרא לשיפור התצוגה

תנ"ך -> כתובים -> משלי

משלי פרק יב

א אֹהֵ֣ב מוּסָר אֹ֣הֵֽב דָּ֑עַת וְשֹׂנֵ֖א תוֹכַ֣חַת בָּֽעַר ׃ ב ט֗וֹב יָפִ֣יק רָצוֹן מֵיְהוָ֑ה וְאִ֖ישׁ מְזִמּ֣וֹת יַרְשִֽׁיעַ ׃ ג לֹא־יִכּ֣וֹן אָדָ֣ם בְּרֶ֑שַׁע וְשֹׁ֥רֶשׁ צַדִּיקִ֗ים בַּל־יִמּֽוֹט ׃ ד אֵֽשֶׁת־חַיִל עֲטֶ֣רֶת בַּעְלָ֑הּ וּכְרָקָ֖ב בְּעַצְמוֹתָ֣יו מְבִישָֽׁה ׃ ה מַחְשְׁב֣וֹת צַדִּיקִ֣ים מִשְׁפָּ֑ט תַּחְבֻּל֖וֹת רְשָׁעִ֣ים מִרְמָֽה ׃ ו דִּבְרֵ֣י רְשָׁעִ֣ים אֱרָב־דָּ֑ם וּפִ֥י יְשָׁרִ֗ים יַצִּילֵֽם ׃ ז הָפ֣וֹךְ רְשָׁעִ֣ים וְאֵינָ֑ם וּבֵ֖ית צַדִּיקִ֣ים יַעֲמֹֽד ׃ ח לְֽפִי־שִׂכְלוֹ יְהֻלַּל־אִ֑ישׁ וְנַעֲוֵה־לֵ֗ב יִהְיֶ֥ה לָבֽוּז ׃ ט ט֣וֹב נִקְלֶה וְעֶ֣בֶד ל֑וֹ מִמְּתַכַּבֵּ֗ד וַחֲסַר־לָֽחֶם ׃ י יוֹדֵ֣עַ צַדִּיק נֶ֣פֶשׁ בְּהֶמְתּ֑וֹ וְֽרַחֲמֵ֥י רְשָׁעִ֗ים אַכְזָרִֽי ׃ יא עֹבֵ֣ד אַדְמָתוֹ יִֽשְׂבַּֽע־לָ֑חֶם וּמְרַדֵּ֖ף רֵיקִ֣ים חֲסַר־לֵֽב ׃ יב חָמַ֣ד רָשָׁע מְצ֣וֹד רָעִ֑ים וְשֹׁ֖רֶשׁ צַדִּיקִ֣ים יִתֵּֽן ׃ יג בְּפֶ֣שַׁע שְׂפָתַיִם מוֹקֵ֣שׁ רָ֑ע וַיֵּצֵ֖א מִצָּרָ֣ה צַדִּֽיק ׃ יד מִפְּרִ֣י פִי־אִישׁ יִשְׂבַּע־ט֑וֹב וּגְמ֥וּל יְדֵי־אָדָ֗ם ֯יָשׁוּב לֽוֹ ׃ טו דֶּ֣רֶךְ אֱוִיל יָשָׁ֣ר בְּעֵינָ֑יו וְשֹׁמֵ֖עַ לְעֵצָ֣ה חָכָֽם ׃ טז אֱוִ֗יל בַּיּוֹם יִוָּדַ֣ע כַּעְס֑וֹ וְכֹסֶ֖ה קָל֣וֹן עָרֽוּם ׃ יז יָפִ֣יחַ אֱמוּנָה יַגִּ֣יד צֶ֑דֶק וְעֵ֖ד שְׁקָרִ֣ים מִרְמָֽה ׃ יח יֵ֣שׁ בּ֖וֹטֶה כְּמַדְקְר֣וֹת חָ֑רֶב וּלְשׁ֖וֹן חֲכָמִ֣ים מַרְפֵּֽא ׃ יט שְֽׂפַת־אֱמֶת תִּכּ֣וֹן לָעַ֑ד וְעַד־אַרְגִּ֗יעָה לְשׁ֣וֹן שָֽׁקֶר ׃ כ מִרְמָה בְּלֶב־חֹ֣רְשֵׁי רָ֑ע וּֽלְיֹעֲצֵ֖י שָׁל֣וֹם שִׂמְחָֽה ׃ כא לֹא־יְאֻנֶּ֣ה לַצַּדִּ֣יק כָּל־אָ֑וֶן וּרְשָׁעִ֗ים מָ֣לְאוּ רָֽע ׃ כב תּוֹעֲבַ֣ת יְהוָה שִׂפְתֵי־שָׁ֑קֶר וְעֹשֵׂ֖י אֱמוּנָ֣ה רְצוֹנֽוֹ ׃ כג אָדָ֣ם עָרוּם כֹּ֣סֶה דָּ֑עַת וְלֵ֥ב כְּסִילִ֗ים יִקְרָ֥א אִוֶּֽלֶת ׃ כד יַד־חָרוּצִ֥ים תִּמְשׁ֑וֹל וּרְמִיָּ֗ה תִּהְיֶ֥ה לָמַֽס ׃ כה דְּאָגָ֣ה בְלֶב־אִ֣ישׁ יַשְׁחֶ֑נָּה וְדָבָ֖ר ט֣וֹב יְשַׂמְּחֶֽנָּה ׃ כו יָתֵ֣ר מֵרֵעֵ֣הוּ צַדִּ֑יק וְדֶ֖רֶךְ רְשָׁעִ֣ים תַּתְעֵֽם ׃ כז לֹא־יַחֲרֹ֣ךְ רְמִיָּ֣ה צֵיד֑וֹ וְהוֹן־אָדָ֖ם יָקָ֣ר חָרֽוּץ ׃ כח בְּאֹֽרַח־צְדָקָ֥ה חַיִּ֑ים וְדֶ֖רֶךְ נְתִיבָ֣ה אַל־מָֽוֶת ׃



   לדף ראשי מאגר ספרות הקודש  

תנ"ך | משנה | תוספתא | תלמוד ירושלמי | תלמוד בבלי | מדרש תנחומא | משנה תורה לרמב"ם
 

לדף ראשי מקראנט | מאגר מידע | הפעלות ממוחשבות | קהילת מורים | אחיתופל | עזרה
 


 

החיפוש באתר זה הוא בשיתוף מורפיקס

כל הזכויות שמורות © 2003-2009 (ראה תנאי שימוש)
 
border
סנונית גשר מט"ח אבי חי מפמ"ר תנ"ך