גרסה רגילה גרסה מפוסקת גרסת טעמי המקרא לשיפור התצוגה

תנ"ך -> כתובים -> משלי

משלי פרק ג

א בְּנִי תּוֹרָתִ֣י אַל־תִּשְׁכָּ֑ח וּמִצְוֹתַ֗י יִצֹּ֥ר לִבֶּֽךָ ׃ ב כִּ֤י אֹ֣רֶךְ יָמִים וּשְׁנ֣וֹת חַיִּ֑ים וְשָׁל֗וֹם יוֹסִ֥יפוּ לָֽךְ ׃ ג חֶ֥סֶד וֶאֱמֶ֗ת אַֽל־יַעַ֫זְבֻ֥ךָ קָשְׁרֵ֥ם עַל־גַּרְגְּרוֹתֶ֑יךָ כָּתְבֵ֗ם עַל־ל֥וּחַ לִבֶּֽךָ ׃ ד וּמְצָא־חֵ֖ן וְשֵֽׂכֶל־ט֑וֹב בְּעֵינֵ֖י אֱלֹהִ֣ים וְאָדָֽם ׃ פ ה בְּטַ֣ח אֶל־יְהוָה בְּכָל־לִבֶּ֑ךָ וְאֶל־בִּֽינָתְךָ֗ אַל־תִּשָּׁעֵֽן ׃ ו בְּכָל־דְּרָכֶ֥יךָ דָעֵ֑הוּ וְה֗וּא יְיַשֵּׁ֥ר אֹֽרְחֹתֶֽיךָ ׃ ז אַל־תְּהִ֣י חָכָ֣ם בְּעֵינֶ֑יךָ יְרָ֥א אֶת־יְהוָ֗ה וְס֣וּר מֵרָֽע ׃ ח רִפְאוּת תְּהִ֣י לְשָׁרֶּ֑ךָ וְשִׁקּ֗וּי לְעַצְמוֹתֶֽיךָ ׃ ט כַּבֵּ֣ד אֶת־יְהוָה מֵהוֹנֶ֑ךָ וּמֵרֵאשִׁ֗ית כָּל־תְּבוּאָתֶֽךָ ׃ י וְיִמָּלְא֣וּ אֲסָמֶ֣יךָ שָׂבָ֑ע וְתִיר֗וֹשׁ יְקָבֶ֥יךָ יִפְרֹֽצוּ ׃ פ יא מוּסַ֣ר יְהוָה בְּנִ֣י אַל־תִּמְאָ֑ס וְאַל־תָּקֹ֗ץ בְּתוֹכַחְתּֽוֹ ׃ יב כִּ֤י אֶ֥ת אֲשֶׁ֣ר יֶאֱהַ֣ב יְהוָ֣ה יוֹכִ֑יחַ וּכְאָ֗ב אֶת־בֵּ֥ן יִרְצֶֽה ׃ יג אַשְׁרֵ֣י אָדָם מָצָ֣א חָכְמָ֑ה וְאָדָ֗ם יָפִ֥יק תְּבוּנָֽה ׃ יד כִּ֤י ט֣וֹב סַחְרָהּ מִסְּחַר־כָּ֑סֶף וּמֵחָר֗וּץ תְּבוּאָתָֽהּ ׃ טו יְקָ֣רָה הִיא ֯מִפְּנִיִּים וְכָל־חֲפָצֶ֗יךָ לֹ֣א יִֽשְׁווּ־בָֽהּ ׃ טז אֹ֣רֶךְ יָמִים בִּֽימִינָ֑הּ בִּשְׂמֹאולָ֗הּ עֹ֣שֶׁר וְכָבֽוֹד ׃ יז דְּרָכֶ֥יהָ דַרְכֵי־נֹ֑עַם וְֽכָל־נְתִ֖יבוֹתֶ֣יהָ שָׁלֽוֹם ׃ יח עֵץ־חַיִּ֣ים הִיא לַמַּחֲזִיקִ֣ים בָּ֑הּ וְֽתֹמְכֶ֥יהָ מְאֻשָּֽׁר ׃ פ יט יְֽהוָ֗ה בְּחָכְמָ֥ה יָֽסַד־אָ֑רֶץ כּוֹנֵ֥ן שָׁמַ֗יִם בִּתְבוּנָֽה ׃ כ בְּדַעְתּוֹ תְּהוֹמ֣וֹת נִבְקָ֑עוּ וּשְׁחָקִ֗ים יִרְעֲפוּ־טָֽל ׃ כא בְּנִי אַל־יָלֻ֣זוּ מֵעֵינֶ֑יךָ נְצֹ֥ר תֻּשִׁיָּ֗ה וּמְזִמָּֽה ׃ כב וְיִֽהְי֣וּ חַיִּ֣ים לְנַפְשֶׁ֑ךָ וְחֵ֗ן לְגַרְגְּרֹתֶֽיךָ ׃ כג אָ֤ז תֵּלֵ֣ךְ לָבֶ֣טַח דַּרְכֶּ֑ךָ וְרַגְלְךָ֗ לֹ֣א תִגּֽוֹף ׃ כד אִם־תִּשְׁכַּ֥ב לֹֽא־תִפְחָ֑ד וְשָׁכַבְתָּ֗ וְֽעָרְבָ֥ה שְׁנָתֶֽךָ ׃ כה אַל־תִּירָא מִפַּ֣חַד פִּתְאֹ֑ם וּמִשֹּׁאַ֥ת רְשָׁעִ֗ים כִּ֣י תָבֹֽא ׃ כו כִּֽי־יְהוָה יִהְיֶ֣ה בְכִסְלֶ֑ךָ וְשָׁמַ֖ר רַגְלְךָ֣ מִלָּֽכֶד ׃ כז אַל־תִּמְנַע־ט֥וֹב מִבְּעָלָ֑יו בִּהְי֨וֹת לְאֵ֖ל ֯יָדֶיךָ לַעֲשֽׂוֹת ׃ כח אַל־תֹּ֘אמַ֤ר ֯לְרֵעֶיךָ לֵ֣ךְ וָשׁוּב וּמָחָ֥ר אֶתֵּ֗ן וְיֵ֣שׁ אִתָּֽךְ ׃ כט אַל־תַּחֲרֹ֣שׁ עַל־רֵעֲךָ֣ רָעָ֑ה וְהֽוּא־יוֹשֵׁ֖ב לָבֶ֣טַח אִתָּֽךְ ׃ ל אַל־֯תָּרוֹב עִם־אָדָ֣ם חִנָּ֑ם אִם־לֹ֖א גְמָלְךָ֣ רָעָֽה ׃ לא אַל־תְּקַנֵּא בְּאִ֣ישׁ חָמָ֑ס וְאַל־תִּבְחַ֗ר בְּכָל־דְּרָכָֽיו ׃ לב כִּ֤י תוֹעֲבַ֣ת יְהוָ֣ה נָל֑וֹז וְֽאֶת־יְשָׁרִ֥ים סוֹדֽוֹ ׃ לג מְאֵרַ֣ת יְהוָה בְּבֵ֣ית רָשָׁ֑ע וּנְוֵ֖ה צַדִּיקִ֣ים יְבָרֵֽךְ ׃ לד אִם־לַלֵּצִ֥ים הֽוּא־יָלִ֑יץ ֯וְלַעֲנִיִּים יִתֶּן־חֵֽן ׃ לה כָּבוֹד חֲכָמִ֣ים יִנְחָ֑לוּ וּכְסִילִ֗ים מֵרִ֥ים קָלֽוֹן ׃ פ



   לדף ראשי מאגר ספרות הקודש  

תנ"ך | משנה | תוספתא | תלמוד ירושלמי | תלמוד בבלי | מדרש תנחומא | משנה תורה לרמב"ם
 

לדף ראשי מקראנט | מאגר מידע | הפעלות ממוחשבות | קהילת מורים | אחיתופל | עזרה
 


 

החיפוש באתר זה הוא בשיתוף מורפיקס

כל הזכויות שמורות © 2003-2009 (ראה תנאי שימוש)
 
border
סנונית גשר מט"ח אבי חי מפמ"ר תנ"ך