גרסה רגילה גרסה מפוסקת גרסת טעמי המקרא לשיפור התצוגה

תנ"ך -> כתובים -> משלי

משלי פרק ד

א שִׁמְע֣וּ בָנִים מ֣וּסַר אָ֑ב וְהַקְשִׁ֗יבוּ לָדַ֥עַת בִּינָֽה ׃ ב כִּ֤י לֶ֣קַח טוֹב נָתַ֣תִּי לָכֶ֑ם תּֽוֹרָתִ֗י אַֽל־תַּעֲזֹֽבוּ ׃ ג כִּי־בֵן הָיִ֣יתִי לְאָבִ֑י רַ֥ךְ וְיָחִ֗יד לִפְנֵ֥י אִמִּֽי ׃ ד וַיֹּרֵ֗נִי וַיֹּ֥אמֶר לִ֗י יִֽתְמָךְ־דְּבָרַ֥י לִבֶּ֑ךָ שְׁמֹ֖ר מִצְוֹתַ֣י וֶֽחְיֵֽה ׃ ה קְנֵ֣ה חָכְמָה קְנֵ֣ה בִינָ֑ה אַל־תִּשְׁכַּ֥ח וְאַל־תֵּ֗ט מֵֽאִמְרֵי־פִֽי ׃ ו אַל־תַּעַזְבֶ֥הָ וְתִשְׁמְרֶ֑ךָּ אֱהָבֶ֥הָ וְתִצְּרֶֽךָּ ׃ ז רֵאשִׁ֣ית חָכְמָה קְנֵ֣ה חָכְמָ֑ה וּבְכָל־קִנְיָנְךָ֗ קְנֵ֣ה בִינָֽה ׃ ח סַלְסְלֶ֥הָ וּֽתְרוֹמְמֶ֑ךָּ תְּכַבֵּ֗דְךָ כִּ֣י תְחַבְּקֶֽנָּה ׃ ט תִּתֵּ֣ן לְרֹאשְׁךָ לִוְיַת־חֵ֑ן עֲטֶ֖רֶת תִּפְאֶ֣רֶת תְּמַגְּנֶֽךָּ ׃ י שְׁמַ֣ע בְּנִי וְקַ֣ח אֲמָרָ֑י וְיִרְבּ֥וּ לְךָ֗ שְׁנ֣וֹת חַיִּֽים ׃ יא בְּדֶ֣רֶךְ חָכְמָה הֹרֵתִ֑יךָ הִדְרַכְתִּ֗יךָ בְּמַעְגְּלֵי־יֹֽשֶׁר ׃ יב בְּֽלֶכְתְּךָ לֹא־יֵצַ֣ר צַעֲדֶ֑ךָ וְאִם־תָּר֗וּץ לֹ֣א תִכָּשֵֽׁל ׃ יג הַחֲזֵ֣ק בַּמּוּסָ֣ר אַל־תֶּ֑רֶף נִצְּרֶ֗הָ כִּי־הִ֥יא חַיֶּֽיךָ ׃ יד בְּאֹ֣רַח רְשָׁעִים אַל־תָּבֹ֑א וְאַל־תְּאַשֵּׁ֗ר בְּדֶ֣רֶךְ רָעִֽים ׃ טו פְּרָעֵ֥הוּ אַל־תַּעֲבָר־בּ֑וֹ שְׂטֵ֖ה מֵעָלָ֣יו וַעֲבֽוֹר ׃ טז כִּ֤י לֹ֣א יִֽשְׁנוּ אִם־לֹ֣א יָרֵ֑עוּ וְֽנִגְזְלָ֥ה שְׁנָתָ֗ם אִם־לֹ֥א ֯יִכְשׁוֹלוּ ׃ יז כִּ֣י לָחֲמוּ לֶ֣חֶם רֶ֑שַׁע וְיֵ֖ין חֲמָסִ֣ים יִשְׁתּֽוּ ׃ יח וְאֹ֣רַח צַדִּיקִים כְּא֣וֹר נֹ֑גַהּ הוֹלֵ֥ךְ וָא֗וֹר עַד־נְכ֥וֹן הַיּֽוֹם ׃ יט דֶּ֣רֶךְ רְשָׁעִים כָּֽאֲפֵלָ֑ה לֹ֥א יָדְע֗וּ בַּמֶּ֥ה יִכָּשֵֽׁלוּ ׃ פ כ בְּנִי לִדְבָרַ֣י הַקְשִׁ֑יבָה לַאֲמָרַ֗י הַט־אָזְנֶֽךָ ׃ כא אַל־יַלִּ֥יזוּ מֵעֵינֶ֑יךָ שָׁמְרֵ֗ם בְּת֣וֹךְ לְבָבֶֽךָ ׃ כב כִּֽי־חַיִּ֣ים הֵם לְמֹצְאֵיהֶ֑ם וּֽלְכָל־בְּשָׂר֥וֹ מַרְפֵּֽא ׃ כג מִֽכָּל־מִשְׁמָר נְצֹ֣ר לִבֶּ֑ךָ כִּֽי־מִמֶּ֗נּוּ תּוֹצְא֥וֹת חַיִּֽים ׃ כד הָסֵ֣ר מִמְּךָ עִקְּשׁ֣וּת פֶּ֑ה וּלְז֥וּת שְׂפָתַ֗יִם הַרְחֵ֥ק מִמֶּֽךָּ ׃ כה עֵינֶיךָ לְנֹ֣כַח יַבִּ֑יטוּ וְעַפְעַפֶּ֗יךָ יַיְשִׁ֥רוּ נֶגְדֶּֽךָ ׃ כו פַּלֵּס מַעְגַּ֣ל רַגְלֶ֑ךָ וְֽכָל־דְּרָכֶ֥יךָ יִכֹּֽנוּ ׃ כז אַֽל־תֵּט־יָמִ֥ין וּשְׂמֹ֑אול הָסֵ֖ר רַגְלְךָ֣ מֵרָֽע ׃



   לדף ראשי מאגר ספרות הקודש  

תנ"ך | משנה | תוספתא | תלמוד ירושלמי | תלמוד בבלי | מדרש תנחומא | משנה תורה לרמב"ם
 

לדף ראשי מקראנט | מאגר מידע | הפעלות ממוחשבות | קהילת מורים | אחיתופל | עזרה
 


 

החיפוש באתר זה הוא בשיתוף מורפיקס

כל הזכויות שמורות © 2003-2009 (ראה תנאי שימוש)
 
border
סנונית גשר מט"ח אבי חי מפמ"ר תנ"ך